Brighton-ah Lallana a chiang

Premier League club Brighton & Hove Albion chuan Adam Lallana chu kum thum chhung atan contract an ziahpui a, Liverpool-a a contract hmang zo tawh midfielder hi free transfer-in an la lut a ni. Kum 32 mi midfielder hian season hman zawh takah khan Liverpool tan inelna hrang hrangah match 22-a khelhsak a, goal khat chauh khung mah se a goal khung erawh Manchester United laka a khung a nih avangin Liverpool tan a hlu bik. 

Brighton boss Graham Potter chuan, "Adam kan lalut thei hi ka lawm takzet. A tawnhriat ngahna leh thiamna kan chhawr thei tur hi kan tan chuan hlawkna ropui tak a ni a, kan squad-a player naupang zawk tan entawn tur ṭha tak a ni ang," a ti. Lallana hian July 2014 khan Southampton aṭangin Liverpool hi pound maktaduai 25-in a zawm a, a hunlaia Reds coach Brendan Rodgers hnuaiah player pawimawh niin Jurgen Klopp-a'n Liverpool-a hun a hman thla hmasa 18 lamah player pawimawh a ni bawk. 

England tana vawi 34 inlan thei midfielder hian Liverpool-a a khelh chhungin Premier League, Champions League, UEFA Super Cup leh FIFA Club World Cup nomawi a chawi hman a ni.