Chanmari FC an tla dawn em?

Mizoram Premier League ṭantirh aṭanga tel, knockout stage awm hnua season tina knockout stage tel pha ziah Chanmari FC chu tla thei dinhmunah an ding. Vawiin tlai dar 3:00 hian RG Stadium-ah Chanmari FC-in Chhinga Veng an hmachhawn dawn a, Chanmarians tan inkhel pawimawh bik a ni.

Chanmari FC hi coach K. Malsawmkima hnuaiah chak hmel an la hmu lo a, match nga aṭangin point khat chauh an hlawh chhuak. Match hmasa berah Police lakah nung takin khel mah se match tinin an phurna a tlahniam a, match hnuhnung berah pawh FC Venghnuai lakah 6-1 in an tlawm.

Chanmari hian phurna an mamawh a, mipui thlawpna ṭha an mamawh. Chanmarians tan inkhel a pawimawh ang thoin Chhinga Veng tan inkhel a pawimawh a, Chhingcows hi a sang pali zinga an awm phak tawh loh avangin chak tumin an khel dawn.

Coach Anand Gurung-a kaihhruai hote hian match hnuhnung berah Electric Veng an hneh lo a, hun rei zawk semifinal khel pha chinah awm mah se a tawp an khar chuan a uiawmna tizualtu mai a ni dawn. A tawi zawng chuan Chhingcows leh Chanmari inkhel a hmuhnawm ang.