Mizoramin Arunachal an hneh lo

2nd NorthEast Olympic 2022-ah Mizoram hmeichhe team chuan nimin khan Arunachal Pradesh an hmachhawn a, Awi Ngaih Dim hmangin hma takah goal khung mah se 3-1 in an chak lo. Mizoram hi tla thei dinhmunah an ding a, chutihrualin group hmahruaitu an la nih theih bakah pahnihna an la ni thei bawk.

Shillong-a inelna neih mekah hian Mizoram hi Meghalaya leh Arunachal Pradesh nen group kahatah an awm. Match hmasa berah Mizoram hian Meghalaya 4-2 an hneh avangin an dinhmun a ṭha a, amaherawhchu Arunachal Pradesh lakah hun ṭha an bawhpelh.

Mizoram coach Lalrintluanga (Saitea) chuan, "Team ṭha zawk kan ni a, kan goal bawh pawh a na zawk. Halftime-ah 1-1 a ni a, chak ngei kan tum avangin attacking football kan khel. Kan nawr luatah kan tisual a, counter attack-ah min chhut let zel avangin kan chak vanduai tak zawk," tiin Vanglaini a hrilh.

November 12, Inrinni hian Meghalaya leh Arunachal Pradesh te an inkhel a, hemi result a zir hian Mizoram dinhmun a chiang ang.