Zanin dar 7:00-ah MPL quarterfinal?

Zote Honda MPL9-ah round thum chauh khelh a ngai tawh a, semifinal khelh tur hriatthiam a la har hle. Zanin dar 7:00 hian semifinal khelh beisei pahnih FC Venghnuai leh Chawnpui FC te an inkhel dawn a, a nihna takah chuan round 12 inkhel ni mah se team dinhmun thlirin quarterfinal-a chhal theih a ni.

Lalrindika Hmar enkawl FC Venghnuai hi table-ah pahnihnaah an awm mek a, palina Chawnpui aiin point hnihin an hmu tam zawk. Venghnuai hian hnehna an chang thei a nih chuan match hnih khelh hmabakah point ngain Chawnpui lakah an sang dawn tihna a ni a, thilmak a thleng a nih ngawt loh chuan semifinal an khel ang.

Mahse, September 12 khan Chawnpui hian Lalliansanga (Notea) goal hmangin Venghnuai hi 1-0 in an hneh tawh. Venghnuai coach Lalrindika Hmar chuan, "Kan hneh tawh lo a, hneh ve kan châk khawp mai. Chawnpui hi an ṭha ka ti a, an fight thei ka ti. Rinthu sawi ila, defensive ve vein kan khelh ka ring," tiin point thum tur awm mah se 'risk' an lak kher loh tur thu a sawi.

Venghnuai tan hian Chanmari 6-1 a an sawp ṭuma khel ṭha captain Vanlalthanga chu hliam vangin bul a ṭan a rinawm lo a, tlarhma lama an player pawimawh Lalrammuanpuia (Apuia) hliam vangin an chhawr thei tawh lo a, chhan dang vangin Lalhruaisanga a tel thei lo bawk. Hemi a nih avang hian Chanmari laka goal hnih khungtu Malsawmzuala Tlangte a pawimawh dawn a, chutihrualin coach thusawi aṭanga teh chuan tlarhnung lam an tih khawng a rinawm.

Chawnpui coach Lalsangzuala Hmar chuan, "Chak ngei ngei a ngai. Mahse, kan naute hi experience player an ni hlawm lo. MPL vawi khat khelhna te an ni a, pressure pek chiam a rem lo. Dawh theih a ngai," tiin Vanglaini a hrilh a, Venghnuai coach nen an inrilru put hmang a inang hle.