Chakna goal khung thiam Yasir

Indian Super League-ah Nilaini zan khan Hyderabad-in Mohammad Yasir goal hmangin Jamshedpur chu 1-0 in an hneh. Kum 24 mi Manipur winger Yasir hian Odisha lakah goal awmchhun a lo khung tawh a, match zawnin chakna goal a khung.

JRD Tata Sports Complex-a inkhelah Jamshedpur tan Mizo tlangval pathum Laldinliana Renthei, Ricky Lallawmawma leh PC Laldinpuia ten bul an ṭan a, mualneitu hian inkhel bul an ṭan ṭha hle.

First half-ah goal khung theihna hun ṭha ṭum thum an nei a; Boris Singh Thangjam ball pet chu keeper Laxmikant Kattimani-a'n a dansak. Hyderabad keeper Kattimani a khel ṭha a, Daniel Chukwu ball tauh chu goalline-ah a dansak bawk.

Second half-ah Hyderabad an insiamrem a, Yasir-a'n box chhung chiahah ball per chang fuhin goal kilah tak a khung. Hyderabad forward Bartholomew Ogbeche pawhin a hun ṭha neih chu goal zawnah a tauh lo.

Hun tawp lamah erawh Jamshedpur an khel ṭha a, siphurh sut thei dinhmunah an ding. New Delhi tlangval Ishan Pandit chuan box chhunga a chance ṭha neih chu goal zawnah a pet thei lo. Hyderabad an che ṭha tluang zel a, match ruk aṭangin point 16 hmuin hmahruaitu an ni.