Premier League khelh hun tur an puang

Khawvela league ngaihven hlawh ber Premier League chuan season thar (2023-24) khelh ṭan hun tur an puang fel der tawh a, August 12, 2023-ah khelh ṭan niin, May 19, 2024-ah khar a ni ang.

Premier League chuan, "Covid-19 leh Qatar 2022 World Cup avanga, a pangngai anga league kalpui theih loh chu season thar aṭang chuan pangngai taka kalpui a ni thei dawn a ni," an ti.

Ruahman dan chuan Krismas leh Kumthar vuak veta league match khelhah, round hnih match-te chu inhnaih taka dah a ni dawn lo a, a inkarah darkar 48 tal a tla ngei ngei dawn.

English top flight league hian an ruahmanna hi an kalpui thei dawn a nih chuan, tun season tawp leh season thar ṭan dawn inkarah player-ten ni 76 chhung league khel loin chawlh hahdamna hun an nei dawn, tihna a ni.

Tun season Premier League hi thlasika World Cup khelh a nih dawn avangin fixture a tawt hle - November 13, Pathianni hian World Cup hmaa match hnuhnung ber chu khelh a ni dawn.

December 26, Krismas ruaiṭheh niah Premier League hi khelh chhunzawm leh tur a ni a, Brentford leh Tottenham Hotspur ten zan dar 6:00-ah inkhelin bul an ṭan ang.