Zaninah Bengaluru Vs East Bengal

Indian Super League-ah zanin dar 7:30 hian Bengaluru-in an mual Sree Kanteerava Stadium-ah East Bengal an mikhual dawn. Sunil Chhetri captain-na hnuaiah Bengaluru hian match hmasa berah NorthEast United an hneh hnuah chak hmel an hmu tawh lo.

East Bengal nen an dinhmun a inang hle. Kolkata club pawh hian NorthEast United chauh an la hneh a, match nga an khelh tawhah point la hmu lo NorthEast United lakah chauh point an la hmu. Chutihrualin Bengaluru erawh an dinhmun a ṭha hret NorthEast United an hneh bakah Chennaiyin FC nen an inhnehtawk.

Bengaluru coach Simon Grayson chuan, "Chak dan hrang hrang a awm a, chak hrim hrim kan mamawh. Hla taka aṭanga goal-a pet a, midang per vanga lut pawh ni se kan duh vek. Goal hrim hrim kan mamawh a ni," tiin a sawi.

Bengaluru hian match li aṭangin goal hnih chauh an la khung a, Alan Costa leh Roy Krishna ten goal khat ve ve a la khung. India captain Chhetri pawhin a la khung lo.

East Bengal hi India coach hlui Stephen Costantine hnuaia khel an ni a, Constantine chuan, "East Bengal ka rawn pan hma hian a harsa dawn tih ka hria. Chutihrualin theihna a awm tih ka hriat avanga zawm ka ni a, kan ropui leh thei ang," tiin beiseina a la neihsan thu a sawi ve bawk.