Qatar-a World Cup nghah hi tihsual a ni - Sepp Blatter

Football khawvela thuneitu sang ber FIFA president Sepp Blatter chuan World Cup 2022 thleng tura Qatar thlan chu tihsual a nih thu a sawi a, Blatter-a hun lai, kum 2010 khan FIFA chuan World Cup thleng turin Qatar hi a thlang a ni.

Qatar hian neih inang inkawp chungchanga a ngaihdan avang te, mihring zalenna leh ram pawn mi, hnathawka awmte an enkawl dan avangin sawiselna an tawk nasa hle.

World Cup khel tur ram leh player ṭhenkhat chuan Qatar-a World Cup khelh hunah Qatar duh lohna hi nasa taka lantir an tum a, hemi avang hian FIFA chuan Qatar-a inlan tur ramte chu football chauh ngaihtuah turin lehkha a thawn hial!

Kum 86 mi Blatter chuan a hunlai khan Qatar-a nghah duh lotu a nih thu a sawi a, "Qatar-a World Cup nghah ka duh loh kha ka tidik chiah a ni," a ti a, Qatar tan World Cup chu a lian mah mah niin a sawi bawk.

FIFA hian kum 12 liam taa World Cup 2022 thleng tur an thlan khan, Qatar leh USA an buk a, middle-east ram hian 14-8 a hnehna changin World Cup thleng tura thlan an ni.

Blatter chuan hetihlai hian USA duha vote a thlak thu sawiin, hetihlaia UEFA president Michel Platini chu Qatar-in a thlen theihna tura hma laah a puh.

FIFA president hlui Blatters chuan, "Duhthlanna ṭha lo tak a ni a, mahse, a hun laia President kan nih avangin mawh ka phur ve bawk. Platini leh a team (UEFA) te vote li avang khan US aiah Qatar-in World Cup a thleng a, chu chu thudik tak a ni," a ti.

Blatter hian kum 17 zet chu FIFA President hna hi a chelh a, mahse, kum 2015 khan Platini hnenah dik lo takin pound maktaduai 1.6 a transfer-a puh niin, a hna aṭangin chawlhtir a ni.

FIFA chuan kum riat chhung football-a inhnamhnawih thei lo turin a hrem zet a, a hnuah kum rukah a tihniam. March 2021 khan kum 2028 thleng atan FIFA code of ethics a bawhchhiat nual avangin hrem leh a ni. Nikum November khan Platini nen thubuai siamsak an ni a, mahse, July khan thiam an chang.

World Cup 2018 Russia leh World Cup 2022 Qatar-in an thlen danah thamna a inrawlh nia sawi a ni a, Swiss thuneitute leh US Department of Justice chuan hemi chungchangah hian kum 2015 khan FIFA hi a chhui hial.

Qatar leh Russia te hian eng thamna mah an hman loh thu an sawi fo a, FIFA pawhin chhui chiang mah se kum 2017 khan ram pahnih hi an puhnaa an fihlim thu an sawi.