Inter chak niah Roma chak zo lo

Nilaini zan Serie A inkhelah Inter Milan chuan goal an chhuah hmasak hnuah Bologna 6-1 in an lehthal a, inkhel dangah AS Roma chu Sassuolo nen 1-1 in an inhnehtawk - Jose Mourinho naute tan champion sawi ngam a harsa ta.

San Siro-a inkelah Inter hian minute 22-naah goal an chhuah hmasa, defender Charalampos Lykogiannis chuan goal hmahruai a khung. Mahse, Simone Inzaghi naute hian goal ruk tehmeuhin an chhang let.

Inter hian an match hnuhnung zawkah Juventus an hneh lo, an chak loh hnuah Inzaghi hian an thawh chhuah leh nghal tur thu a sawi a, a sawi ang ngeiin an mikhual lakah zahngaihna an lantir lo hle.

Simone Inzaghi chuan, "Football-ah chuan rilru puthmang hi a pawimawh takzet, tun hnaia match li chhung chak zawk thei kan hmachhawn a, goal kan chhuah hmasa bawk, chuti chunga kan thawh chhuah leh theih dan kha a lawmawm hle," a ti.

Inkhel dangah Tammy Abraham chuan Roma tan goal a khung. England striker hian Serie A season kal laia a goal lina a ni a, mahse chak nan a tawk zo lo. Minute 80-naah goal khung mah se, goal an neih aṭanga minute nga hnuah an chhuah leh nghal a, point khatah lungawi a ngai.

Mourinho naute hian Serie A match 14 aṭangin point 26 an nei a, khelh zat inangah hmahruaitu Napoli chu point 12 zetin an phak lo.