Brenford tan thawh chhuah a hun

Brentford hi Championship match hnuhnung pahnih an chak loh an tuar a, pahnihna ni chunga Premier League khel thei khan playoff an khelh a ngaih phah. Tunah phei chuan Brentford dinhmun a chhe lehzual, first leg-ah Swansea lakah 1-0 in an tlawm a, Premier League beiseina chhi nung turin zanin dar 12:15-a Swans an mikhual hunah chak ngei an mamawh ang.

Championship leh Premier League kar a hla a, kum 130-a upa club Brentford hian Premier League an la khel lo. Championship match hnuhnung pahnihah Stoke City leh Barnsley an hneh lo a, pakhat zawk chauh pawh hi hneh se Premier League an khel ang. Tunah erawh a pawi tur ang pawi zo tawh.

Brentford-in an mual Griffin Park-ah Swansea an lehthal a ngai a, tun season-a vawi hnih an inkhelh tawhnaah 3-0 leh 3-1 a hnehna an chan avangin beiseina a la nei sang khawp ang. Chutihrualin Brenford khingpui Swansea hian 2017-18 khan Premier League an la khel a, player tawnhriat nei ṭha first leg-a goal awmchhun khungtu Andre Ayew te an kawl avangin dahhniam theih an ni lo ang.