Sawifiah ngaihna a awm lo - Atletico captain

Atletico Madrid captain Koke chuan tun hnaia an chet dan chu hriatthiam har a tih thu a sawi a, an match hnuhnung bera Mallorca 1-0 a an hneh loh phei chu sawi fiah ngaihna awm lo niin a sawi.

Nilaini zan La Liga inkhelah Mallorca tana Vedat Muriqi goal khung chu Atletico lamin chhanletna tur an nei lo, inkhel thununin shot pawh vawi 17 lai nei mah se a pawimawh ber goal an khung thei lo.

Atletico captain Koke chuan, "Tuna kan kal ang hi chuan khua a var lo rih hle. A nihna takah chuan World Cup chawlh a awm tur hi a ṭha nge ṭha lo tih pawh sawi thiam a harsa, tun hma lama kan kal dan ang kha nei leh turin eng emaw tih danglam ngai chu a awm," a ti.

Atetico Madrid hi Champions League aṭangin an tla tawh. Group B-ah a hniam ber an nih avangin Europa League pawh an khel chhunzawm phak lo. La Liga-ah pawh parukna an ni mek, pakhatna Barcelona aiin point 13 zetin an hniam.