I League fixture a chhuak ta
Nimin khan All India Football Federation chuan I League fixtures an tichhuak a, champion lai Aizawl FC chuan an match hmasa berah East Bengal chu November 28 khian Kolkata-ah an hmachhawn nghal ang.
Mizo club AFC hian Mizoram Premier League Season 6-ah semifinal an lut tawh. I League club hian MPL-ah pahnihna dinhmun an hauh chiang tawh a, final luh inchuhna second leg hi November 30, Ninganiah an khel bawk dawn a ni.
I League khel tur
Kumin I League hi team 10 in an khel dawn. Champion lai Aizawl FC bakah Mohun Bagan, East Bengal, Shillong Lajong, Churchill Brothers, Minerva Academy leh Chennai City te chu season liam taa inlan tawh te an ni.
Manipur club NEROCA chu I League 2nd Division champion ni chungin an inpet tling a, Kerala club Gokulam FC chu I League khel turin an in lei tling a, kumin hian Indian Arrows chu din thar leh a ni bawk.
AIFF chuan Indian Arrows-ah hian Under 17 leh Under 19 players an dah khawm a, he club hi Indian player ṭha zawk chher chhuahna atana tih a ni.
NorthEast Derby
Aizawl FC-in I League an khelh aṭangin Shillong Lajong nen NorthEast Derby an khel nghal a, kuminah erawh Manipur club NEROCA an tel dawn avangin North East Derby ngaihven hlawh zawk hmuh tur a awm ang.
NorthEast state zinga football thiam ber tiha sawi ṭhin chu Manipur an ni a, amaherawhchu Mizoramin kum 2014-a Santosh Trophy an chawi hnuah hma sawn chho zelin National Games-a gold medal an lak zui bakah I League-ah Aizawl FC an champion bawk.
Hei vang hian Mizoram hi North East-a football thiam ber anga sawi theih ni hman mah se kumin FIFA Under 17-ah Manipur lamin player an thawh hnem zawk a, state pahnih hian chungnung zawk nih an inchuh chho zel ang.
Krismas Vuakvetah
Kumin I League hi Krismas vuakvetah pawh khelh a ni vek dawn. Aizawl FC-in home match an khelh hmasak ber tur chu December 13, Nilaini a ni a, Goan club Churchill Brothers an mikhual dawn.
Mizo club hian December 27-ah Minerva Academy an mikhual zui ang a, kum hlui thlah niah Kerala-ah Gokulam FC an hmachhawn dawn bawk.
February a harsa dawn
Aizawl FC tana thla harsa ber tura ngaih chu February thla a ni a, ni 28 chhungin match sarih an nei a, chung zinga match ruk chu khualmualah a ni dawn.
Portuguese manager Paulo Meneses chuan, "Kan fixtures-ah sawisel tur kan nei lo a, amaherawhchu February thla erawh a harsa dawn. Khualmuala match ruk tawp khel tur kan nih avangin kan fimkhur hle a ṭul dawn a ni," tiin I League fixtures chungchanga a ngaihdan Vanglaini a hrilh.
ISL nena kal rual
Tun season hian a vawi khat nan I League leh Indian Super League chu a ruala kalpui a ni dawn a, ISL kickoff hi November 17 hian Kochi-ah neih a ni dawn. I League erawh ṭan tlai hretin match hmasa ber chu Mohun Bagan leh Minerva Academy ten November 25 tlai dar 2:00-ah Guru Nanak Stadium-ah an khel thung ang.
ISL league match 90 zinga 47 chu kartawpah khelh a ni dawn a, I League fixtures match 82 tihchian tawh zinga 33 chu kartawpah khelh a ni ang. ISL lam hian inkhelh hun hi Pathiannia match hnih a awm tih loah chuan zan dar 8:00-ah an khel a, I League erawhin tlai dar 2:00-a inkhel ringawt pawh match 39 an nei thung.
Aizawl FC Fixtures
November 28, Thawhlehni
8:00 PM East Bengal Vs Aizawl FC
December 13, Nilaini
2:00 PM Aizawl FC Vs Churchill Brothers
December 18, ThawhṬanni
2:00 PM Aizawl FC Vs Shillong Lajong
December 27, Nilaini
2:00 PM Aizawl FC Vs Minerva Academy
December 31, Pathianni
2:00 PM Gokulam FC Vs Aizawl FC
January 7, Pathianni
2:00 PM Mohun Bagan Vs Aizawl FC
January 13, Inrinni
2:00 PM Aizawl FC Vs Chennai City
January 20, Inrinni
2:00 PM Aizawl FC Vs NEROCA
January 25, Ningani
2:00 PM Aizawl FC Vs Mohun Bagan
January 29, ThawhṬanni
2:00 PM Aizawl FC Vs East Bengal
February 3, Inrinni
2:00 PM Chennai City Vs Aizawl FC
February 6, Thawhlehni
5:30 PM Churchill Brothers Vs Aizawl FC
February 10, Inrinni
2:00 PM NEROCA vs Aizawl FC
February 16, Zirtawpni
5:30 PM Indian Arrows Vs Aizawl FC
February 19, ThawhṬanni
8:00 PM Shillong Lajong Vs Aizawl FC
February 23, Zirtawpni
2:00 PM Aizawl FC Vs Indian Arrows
February 26, ThawhṬanni
8:00 PM Minerva Academy Vs Aizawl FC
March 1, Ningani
2:00 PM Aizawl FC Vs Gokulam FC