Mangṭha mai le Gigi

Italy-in World Cup an khel dawn lo a, Italy legendary goalkeeper Gianluigi Buffon tan international career a tawp ve nghal. Juventus keeper hian World Cup zawhah football a chawlhsan tur thu a puang tawh a, World Cup a khelh dawn tak loh­ah chuan club season zawh rualin Buffon hi a chawl ve nghal dawn tihna a ni.

Ram tana match 175 inlan thei keeper chuan, "Keima lamah chuan inkhawngaihna ka nei hran lo. Mahse Italian football hi ka tawrhpui a ni. He ram pumpui tana hlu em em mai inelna chu kan khel thei dawn ta lo a ni," tiin mittui nen ram tana a match hnuhnung ber chu a mangṭha.

Kum 39 mi goalkee­per chuan sawi chhunzawm­in, "Ram tana ka match hnuhnung berah World Cup kan inpetkai zo lo hi pawi ka ti takzet. Kan hlawhchhamnaah hian tumah mawhpuh tur bik an awm lo a, kan vai hian mawhphurtu vek kan ni," a ti.

Buffon bakah hian Juventus tana a khelhpui Andrea Barzagli leh Roma midfielder Daniele de Rossi te pawhin ram tana inkhelh an chawlhsan thu an puang a, Giorgio Chiellini chu chawl ve tura rin a ni bawk.

Ram tana kum 20 zet a inlan chhunga kum 2006-a World Cup nomawi chawipuitu Buffon chuan Italy-in hmabak eng tak an neih thu sawi nghalin, "Tun hi Italian football thihna a ni lo. Tumruhna, huaisenna leh theihna kan nei a, harsatna manganthlak tak kan tawh hnuah kan tho leh ziah ṭhin a ni," a ti.

Juventus chuan, "Bian­coneri (Juventus sawina) chu i lamah kan ṭang vek a ni. Kan ram ti mawitu i ni a, khawvela goal­keeper ṭha ber i ni," an ti a, FIFA chuan, "Azzurri legend mangṭha mai le, World Cup champion i nihna kan hre reng ang," tiin an thlah bawk.

Italy rama sports chanchinbu lar ber La Gazzetta dello Sport chuan, "June-ah eng thil dang nge kan tih ang? Concert, cinema, kutpui maw? Eng pawh kan ti thei ang. Mahse, World Cup-a Sweden inkhel lai en erawh a na dawn lutuk," tiin an ziak a, World Cup an khel lo tur chu an la na hle.