Palace chhuahsan tumtu Zaha

Crystal Palace manager Roy Hodgson chuan a player pawimawh Wilfried Zaha chuan Palace chhuahsan a tum thu a sawi a, kum 27 mi forward hi season ṭan dawn khan Everton leh Arsenal nen sawizawm a lo ni tawh. 

Mahse, beisei angin Zaha a chhuak thei lo a, nipui laia club dang a zawm thei lo hian a rilru thlengin a nghawng niin Hodgson chuan a sawi. Palace boss chuan, "Nipui laia a chhuak thei lo khan a rilru lam thlengin a nghawng tih hi chu a chiang a ni. 

"Kar liam ta chhunga a khelh dan en ila, a theihna nena khaikhina ralah chuan a ṭha lo em em a ni," a ti a, a player chuan a rilru a pe tawk tawh loah a ngai. English coach tawnhriat nei ngah chuan sawi zawmin, "Kan hnena awm tawh lo tura thutlukna a siam a nih chuan hrehawm kan ti khawp ang. Keini chuan kan ngaina em em a, min ngaina let ve turin kan ti ngawt thei lo. Tuna kan dinhmun hi chu amah leh club chauhin an chinfel theih a ni a, kei chuan a chhanna ka nei lo a ni," a ti. 

Palace academy aṭanga inzirchhuak Zaha hian kum 2013 khan amah siam liantu club hi chhuahsanin Manchester United a lo zawm tawh a, a hunlaia media chaw tui ber tling phak hian Old Trafford-ah beisei a phak lo zui. 

Kum 2014 khan Palace-ah hian loan-in a kir leh zet a, a hnuah a nghetin a club hlui hi a zawm. Season hmasa khan Premier League-ah goal 10-a khung a, tun season-ah erawh goal li chiah a khung thung - 2015-16 season hnua Premier League season khata goal a khung tlem ber ṭum a ni.