Rafael Nadal tan season a tawp

World number 1 Rafael Nadal chu tun season chhungin a inkhel tawh dawn lo. Thawhṭanni zan khan Nadal hian ATP World Tour Finals-a a match hmasa ber khelin David Goffin lakah a chak lo, Spain tlangval hian a chak loh hnuah a khup na vanga a inhnuhdawh thu a sawi zui nghal.

Grand Slam vawi 14 cham­pion tawh Nadal hi Paris Master quarterfinal an khelh dawnin a khup hliam vangin a inhnukdawk tawh a, a thiam zual pariat inelna ATP Finals-ah erawh a inlan lui hram. Amaherawhchu, London-ah Nadal hian match khat bak a khel thei ta lo; group match hmasa berah hian darkar hnih leh minute 36 chhungin 7-6 (5), 6-7 (4), 6-4 in a chak lo a ni.

Kum 31 mi Nadal chuan, "Ka tan season a tawp, he inelna hi ka ngaihluin kan khelhna khawpui pawh hi ka ngaina hle. Ṭha taka khelh duh mah ila na ka neih avangin ka ti zui thei tawh lo, Goffin lakah khatiang zat point ka hmu thei kha a mak zawk hial," a ti.

ATP Finals khel player pariatte hi group pahnihah ṭhen hran an ni a, an inkhelh kual hnuah a sang pahnihin semifinal an lut dawn. Nadal hi chak lo mah se knock out round beiseina a la nei thei; mahse a suangtuah lawk loh danin season a khar a ṭul ta zawk a ni.

Singles title 75 la tawh Nadal hian kuminah French Open leh US Open nomawi a chawi a, Australian Open final a lut bawk; a vawi li nan world number 1 ni chungin season a khar dawn tih a chiang tawh - a hnuai chiahah hian Roger Federer a awm ve bawk a ni.

Seeded pasarihna Goffin chuan, "Rafa hi court chhungah chuan player huaisen leh tawh­khirh berte zinga mi a ni. Engtiang takin nge hnehna ka chan tih pawh ka hrethiam mai lo, ka tan chuan ani hneh hi chawi­mawina a tling," tiin a sawi.

Pete Sampras Group match dangah Grigor Dimitrov chuan Dominic Thiem lakah 6-3, 5-7, 7-5 in hnehna a chang. Bulgarian tlangval Dimitrov hian tun season hmang ṭha tak Thiem hmaah a zam tih a pha lo a, hnehna a chang chu vannei a intih thu a sawi.

Kum 26 mi Dimitrov chuan, "Zep lohah chuan ka zam ve hle, set hnuhnung ber kan khelh lai khan match point vawi thum ka hmuhna ka chhawr ṭangkai thei hram, vanneih vang a ni," a ti. Dimitrov hian darkar hnih leh minute 19 chhungin hnehna a chang.