Watford-in Everton dilna an hnawl

Premier League club Watford chuan Everton-in an manager Marco Silva chhuhsak an tumna chu an hnawl sak. Watford hian Portuguese manager chu engti zawng maha chhuahtir an tum loh thu an tichiang.

Kum 40 mi Silva hian season hmasa khan Hull City a enkawl a, Premier League-ah inhamtan pui zo lo mah se a hnathawh dan a ṭhat avangin hnathawh tur dang a haihchham lo. Vicarage Road-ah hian league match 11 bak a la enkawl hman lo tihin club dangin an hmutai leh nghal.

Everton-in hmasawn tumin transfer bazar-ah sum an hmang hnem a, beisei an phak loh avangin manager Ronald Koeman an ban. Dutch manager thlak tura an duh Silva hi awlsam takin an la chhuak dawn lo niin a lang.

Tun dinhmunah Toffees hi U-23 coach David Unsworth-a'n a enkawl lailawk mek a, Unsworth kaihhruaina hnuaiah hian match li khel tawhin vawi khat bak hnehna an la chang lo; an chak chhun hi Watford niin goal hnih an phurh hnuah 3-2 in an lehthal hram a ni.

England manager hlui Sam Allardyce leh Burnley manager Sean Dyche te chu Goodison Park pan tura sawi zawm an ni leh nghal a, tunkar tawpa Crystal Palce an hmachhawn hma chuan manager thar an nei hman dawn lo nia ngaih a ni.