Italy tel lohna World Cup

Football thiam ram Italy chuan kum 1958 hnua a vawi khat nan World Cup an khel dawn lo - football khawvelin Italy tel lohna World Cup a mitthla thiam lo a, vawi li lai World champion ni thei Italy mipui ten an tel loa ram 32-in World Cup nomawi an inchuh tur an hrethiam thei lo.

Mahse, Italy-in World Cup playoff-ah Sweden an ngam lo miau a, Russia 2018-ah World Cup an khel dawn lo. Ram pahnih intawn hmasakah Sweden hian 1-0 in hnehna an chang a, Italy-in result thlak danglam beiseiin Thawhṭanni zan khan Sweden an mikhual - an beisei ang result erawh a thleng lo a, goal khung loa an inhnehtawk hnuah inkhel pahnih belhkhawma chak zawk Sweden an tlang.

Van a duai

Italy boss Giampiero Ven­tura-a'n Sweden an mikhual hmain, "World Cup kan khelh theih dan awmchhun chu ṭha chungchuang taka khelh a ni," tiin a sawi a, a nauten a beisei ang ngeiin khel mah se goal erawh an keng tel lo - Azzurri chance ṭha ber nia ngaih chu substitute Stephan El Shaarawy koah a tla a, mah se Sweden goalkeeper Robin Olsen 'fakna' mai a ni.

Ball possession 76% nei chunga hnehna chang zo lo Italy tan Ciro Immobile chuan chance ṭha vawi tam a nei a, goal erawh a khung thei lo - first half-a a pet goal ngei tur nia lang tawh centre back Andreas Granqvist-a'n goal line aṭanga a lo petchhuah hman chu a ui khawp ang. Italy-in a vawi hnih nan World Cup an khelh dawn loh laiin Sweden erawh 2006 hnuah a vawi khat nan an tling ve leh ta.

A na a ni

Italy-in inkhel pumpui thu­nunin goal-ah shot vawi 20 ngawt nei mah se Sweden tlarhnung an ṭang khawng tlat a, goal khat an nei sa tawh tih inhriain tlarhnungah player paruk an ding chang pawh a awm! Sweden player ten an penalty box aṭanga ball petchhuah an neih zat ringawt hi vawi 56 a ni a, Italy player-te ball ken lai an chhuhsak vawi 19 a awm bawk.

Ram pahnihin penalty hmuh­na chance an nei ve ve - Swede left back Ludwig Augustinsson-a'n Marco Parolo a tih tluk avanga penalty a chawi lo chu a vannei a, Manchester United defender Matteo Darmian leh Juventus veteran Andrea Barzagli te handball hmuhmaih a ni bawk. Sweden keeper Olsen-a'n Jorginho leh Alessandro Florenzi te chance neih chu ṭha takin a dan sak bawk a, Italy-in an beisei goal an hmu thei lo - hun tawp hamrik ham a ni a, khelmualah mittui nen Italy player-te an bawk a, San Sirp stadium-a fan-te mittui lah a hul bik chuang lo.

Demawm Ventura?

Napoli forward Lorenzo In­signe-a'n Serie A khelh mekah goal thum khung tawhin assist vawi li a nei tawh a, hetichung hian Ventura hnuaiah hmun a chang phak chuang lo. Sweden nena an intawn hmasakin bench-ah dah a ni a, Ventura-a'n sawiselna nasa tak a tawn phah. Mahse, San Siro-ah pawh Insigne tan hmun a awm chuang lo.

Ventura-a'n Daniele De Rossi dah luh a tum a, mah se Roma defensive midfielder hian Insigne luhtir zawk turin coach a hrilh - mah se Ventura-a'n a ngaithla chuang lo. De Rossi chuan, "Dik taka sawi chuan hun tawp lam kan hnaih tawh a, World Cup khel turin hnehna kan chan ngei ngei a ṭul bawk. Chumi tur chuan goal khung thei tur player tlan luhtir tur a ni a, Insigne luh kha ka tan a ṭha zawk a ni," a ti a, Ventura-a'n a luhtir lo ve ve.

Ventura a la bang lo

A formation hman leh Italy a chhawr dana sawisel hlawh tak Ventura-a'n banna a thehlut nghal nia sawi a ni a, mah se kum 69 mi manager chuan a la ban loh thu a sawi. Italy boss chuan, "President nen inbiakna kan la nei lo a, banna ka la thehlut lo. Ban lam sawi thei ka la ni lo, buaina kan neihte ka zirchiang phawt ang a, federation nen kan inhmu phawt ang a, kan la sawi ho ang chu," a ti.

Ventura thlak turin manager hming langsar tak tak lamrik an ni nghal a, an zinga ri ring ber chu AC Milan, Juventus leh Chelsea manager hlui Carlo Ancelotti a ni. Season ṭantir lama Bayern Munich-in an ban tak manager bakah hian England ning tawh nia an sawi Chelsea boss Antonio Conte, Manchester City manager hlui Roberto Mancini leh Juventus manager Massimiliano Allegri te hming lamrik a ni.