Ropuina rama Liverpool hlangtu Klopp tan ropuina LMA manager of the year Jurgen Klopp

"Beiseina nei tawh lo te chu beiseina kan siamsak leh ang," tih chu Jurgen Klopp-a'n English club tluchhe mek Liverpool a enkawl tirha a sawi a ni a, kum li chhunga nomawi a chawi ngei tur thu a sawi bawk. 

'The Normal One' hian a sawi ang ngeiin beiseina nei tawh lo te beiseina chu a din thar leh a, an club tluchhe mek thlirtute kha nomawi lawmin an lam ve leh ta - Klopp-a hnenah a hnathawh rah lawmman pek a ni a, League Managers' Association manager of the year atan thlan a ni. 

Jurgen Klopp chuan, "LMA manager of the year ka ni thei hi ka lawm takzet a, ka mi ngaihsan em em Sir Alex Ferguson-a hming chawi lawmman ka dawng hi ka hlim hle a ni," a ti. Liverpool captain Jordan Henderson chu Football Writers' Player of the Year-ah thlan a  lo ni tawh bawk a, league nomawi piah lamah Reds chhungkuain mimal chawimawina an dawn belh zel. 

Manchester United boss Sir Alex Ferguson chuan Sky Sports kaltlangin LMA manager of the year-a Klopp thlan a nih thu hi a puang a, zing dar 3:30-a a kaihthawh vanga a ngaihdam thu a sawi zui!

Sir Alex chuan, "Jurgen Klopp, i hnathawh a ropui takzet a, he chawimawina hi i phu a ni. I team khelh dan a ropui a, i club enkawl hian nangma nihphung zawng zawng a pho chhuak a ni. "Zing dar 3:30 vela Premier League-a in champion thu min hrilh tura min phone harh avang pawhin ka ngaidam ang che - ka lawm e," tiin Liverpool boss hi a lawmpui. 

Klopp chuan, "Liverpool manager ka nih avangin Sir Alex ngaihsan viau hi a fuh lo mai thei a, mahse ka ngaina takzet a ni. British manager ka kawm hmasak ber a ni a, zing chaw kan ei dun nghe nghe. Ani chuan a hre tawh lo mai thei a, ka tan erawh duh huna Pope hmuh ang mai a ni a, kan intawn tirh aṭang khan kan inngaina nghal a ni," a ti.

Borussia Dortmund boss hlui Klopp hian October 2015 khan Liverpool hi a enkawl ṭan a, a hunlaia club talbuai tak hi a season hmasa berah League Cup leh Europa League final a khelhpui nghal. Champions League 2017-18 ah final a luhpui a, season hmasaah lut nawnin a champion pui - tun season-ah kum 30 hnua a vawi khat nan league-ah Liverpool a champion pui a, UEFA Super Cup leh FIFA Club World Cup nomawi a chawi bawk. 

Klopp erawhin a mimal hnathawh avanga chawimawina dawng a ni lo tih inhre reng chungin, "Ka thawhpui coaching staff-te aiawhin lawmman ka dawng mai a ni. Manager pangngai ve tak ka ni mai a, ka staff-te nen hian football thluak ṭha tak kan din ho zawk a ni. Pep Lijnders, Peter Krawietz, John Achterberg, Vitor Matos leh Jack Robinson te nena kan thawk ho thei hi ka lawm takzet," a ti a, a ṭhiante a theihnghilh lo. 

German coach chuan sawi chhunzawmin, "Manager of the year lo ni tawh manager ropui tak tak te kianga ka hming a chuang ve ta hi ka lawm a, a bik takin Liverpool boss hlui Bill Shankly, Bob Paisley, Joe Fagan, Sir Kenny Dalglish leh Brendan Rodgers-te nen huang khata awm hi a nuam lehzual," a ti a, a lawmman dawn chu a manager pui ten an thlan a nih avanga a ngaihhlut thu a sawi bawk. 

Premier League    Jurgen Klopp, Liverpool

Championship    Marcelo Bielsa, Leeds United  

League One    Mark Robins, Coventry City  

League Two    David Artell, Crewe Alexandra 

FA Women's Super League    Emma Hayes, Chelsea

Women's Championship    Gemma Davies, Aston Villa