World Cup khel tur hriat kim dawn

FIFA World Cup 2018 khel tur zawna match hnuhnung chu Ningani zing dar 7:45 hian Peru leh New Zealand ten an khel dawn a, vawiin tlai dar 2:30-ah Australia leh Honduras te an inkhel bawk ang.

Playoff match hnih first leg-ah goal a luh loh avangin second leg hi World Cup khel tur hriltu tur a ni. Nizan khan Europe lama playoff match hnuhnung berah Republic of Ireland leh Denmark te an inkhel a, result kan hre hman lo.

Peru leh New Zealand

South America ram Peru-in World Cup an khelh hnuhnun ber chu 1982 daih tawh kha a ni a, football inelna lianah hian ṭum li lai chu inlan ve tawh mah se an khelh hun hi tun hma tiha sawi theih vek a ni.

New Zealand erawh kum 2010 khan an inlan a, hei bakah hian kum 1982-ah an inlan tawh bawk. All Whites (New Zealand sawina) hian World Cup an khelh hnuhnun ber hian playoff an paltlang a, amaherawhchu hetih hunlai hi chuan Asia khawmualpui ram nen playoff an khel thung.

New Zealand hian first leg-ah goal awm loin Bahrain an draw hnuah an mualah 1-0 in an chak a, tun ṭumah erawh hmabak a ko dawn. Khualmualah goal an khung a ngai a, an khung lo a nih pawhin penalty shootout thlir chungin goal venhim a ṭul ang.

Rinkai zawk Peru

Peru hi FIFA ranking-ah 10-na an ni a, an ram khawpui Lima-a an khelmual Estadio Nacional-ah an khelh dawn bawk avangin chak tura ngaih an ni.

New Zealand tana harsatna belhchhah turin Thawhṭanni khan Peru khawpui Lima an thleng a, darkar 24 zet hun an hman bakah an khingpui Peru aiin darkar 30 in inkhelhna hmun tur a thleng tlai bawk.

First leg-ah New Zealand-in ball channa hun an nei tam a, team ṭha zawka ngaih Peru-in pressure an pe na tawk lo. Amaherawhchu, second leg-ah chuan game plan a dang dawn a, New Zealand-in nasa zawka goal venhim a ṭul ang.

Australia dinhmun a ṭha

San Pedro Sula-ah Australia-in goal an khung thei lo a, minute 90 chhungin mualneitu Honduras an ngam zawk. Vawiin tlaiah erawh Socceroos-in Sydney-ah an mikhual ve dawn thung a, World Cup khelhna hun ṭha bawhpelh an duh lo ang.

First leg-ah hian Australia-in playoff an khelh theih nana Syria lama goal pawimawh khungtu Tim Cahill a inlan lo a, second leg-ah erawh koh a nih phawt chuan a inpeih thu a sawi. Cahill chuan, "Honduras-ah khan min khelhtir se eng emaw chu kan ram tan ka tih theih ka ring. World Cup a zawna ṭum li kan khelh theih nan kan theihna zawng zawng nena kan khelh a ṭul a ni. Honduras hi ka dah hniam lo a, amaherawhchu first leg-a kan inkhelh dan thlir kha chuan beisei sang tak ka nei a ni," tiin a sawi.

Everton midfielder hlui Cahill hi kum 37 a tling tawh a, Socceroos tana goal khung tam ber niin ram tan goal 50 a khung tawh a ni.

Ram 29 tling tawhte
Asia (4): South Korea, Iran, Saudi Arabia leh Japan
Africa (5) : Tunisia, Nigeria, Morocco, Senegal leh Egypt
North America (3) : Costa Rica, Panama, leh Mexico
South America (4) : Colombia, Uruguay, Argentina leh Brazil
Europe (13) : Russia (A thlengtu), France, Portugal, Germany, Serbia, Poland, England, Spain, Belgium, Iceland, Croatia, Switzerland leh Sweden