China lamah Saina leh Prannoy

Badminton National champion Saina Nehwal leh HS Prannoy te chuan season tawpa khelh tur Dubai Super Series khelh phak tumin hma an la mek zel a, tun kar chhunga khelh tur China Open Super Series Premier-ah an inlan dawn; inelnaah hian lawmman atan $700,000 (Rs 4,57,48,500) sem ral a ni ang.

World number 1 hlui Saina hian Rio Olympic silver medalist PV Sindhu hnehin a vawi thum nan Senior National Badminton champion a ni a, mipa inelna lamah pawh Prannoy chuan Kidambi Srikanth hnehin a vawi khat nan a champion ve bawk.

Saina leh Prannoy te hi world ranking-ah 11-na dinhmun luah mektu an ni a, Super Series Final khelh hma hian Super Series pahnih China Open leh Hong Kong Open khelh tur a la awm a, an ranking siamṭhat theihna hun ṭha an la nei a ni.

Kum 27 mi Saina hian a match hmasa berah Beiwen Zhang a hmachhawn dawn a, mipa singles lamah Prannoy hian qualifier a khelh a ngai dawn thung.

Indian shuttler dang Srikanth chuan chawlh hahdam a duh avangin a inlan dawn lo, tun season chhunga Super Series nomawi pali chawi tawh Srikanth hi Hong Kong-ah chuan inlan thei tura beisei a ni. Indian shuttler dang Sameer Verma, Ajay Jayaram leh B Sai Praneeth te pawh China-ah hian an inlan dawn lo.