Liverpool-ah Coutinho a hlim

Barcelona nena sawizawm hlawh mek Liverpool midfielder Philippe Coutinho chuan Anfield-ah a hlim thu a sawi chhuak. Brazilian midfielder hi nipui transfer lai khan Barcelona-in lakluh tumin an hel a, amah ngeiin chhuah dilna hial thehlut mah se Merseyside club hian chhuahtir an phal lo.

Tun hnaiah Barcelona hian Brazil international hi January transfer-a lakluh tumin ruahmanna an kalpui leh mek nia sawi a awm a, hemi chungchangah hian Coutinho chu a ṭawng chhuak a ni. Kum 25 mi Liverpool thiampuipa chuan, "Khawvela league lian berah ka khel mek a, ka hlim em em a ni. Tunah chuan Brazil squad-ah ka awm mek a, thil dang ka ngaihtuah hman lo. Tun dinhmunah chuan ka nunah hian ka hlim em em," tiin khawdang a hawi rih loh thu a sawi.

Coutinho hian tun season-ah hliam vanga a buai fo avangin Liverpool tan match riat chiah a la khel a, goal li a khung tawh.