Pathianniah World Cup final

T20 Cricket World Cup final chu November 13, Pathianni tlai dar 1:30 hian Pakistan leh England ten Melbourne Cricket Ground-ah an khel dawn.

ODI World Cup-ah chuan kum 1992 khan MCG-ah team pahnih hi an lo inhmachhawn tawh a, Pakistan hi 22 runs-in an chak.Tun ṭumah erawh Three Lions hi rinkai zawk an ni thung.

Mahse maw, T20 batting ranking thlir chuan top 5-ah Pakistan opener Mohammad Rizwan leh Babar Azam te an awm. An khelh ṭhat ṭum chuan chakpui tham an ni.

Chutihrualin, England opener Jos Buttler leh Alex Hales te inkawp ringawtin semifinal-ah India an hneh a, finisher ṭha Ben Stokes te pawh an inlan hman lo.

Cricket inelna chi thum Test, ODI leh T20 hi a kalhmang a danglam vek a, T20 bikah hian a thiam thiam an chak kher lo. Ṭhumvawr a pawimawh a, Pakistan hi dah hniam zawk ni mah se South Africa leh New Zealand hneh theitu an ni.

Final bikah hian inelna kalphung a dang hret. Super 12-ah kha chuan an inhnehtawk a nih chuan team pahnihin point khat ve ve an hmu a, final-ah erawh ruahsurin a tihbuai a nih chuan November 14, Thawhṭanni chu 'reserve day' atan dah a ni.

Chutihrualin reserve day hmang loa Pathiannia inkhelh zawh chu an tum hmasak tur a ni. Over tihtawi a ngai a nih pawhin an ti tawi mai ang. Mahse, over 10 ve ve tal an khelh erawh a ngai dawn.

Reserve day an hman hnuah pawh ruahsur vanga an khel zo thei lo a nih chuan England leh Pakistan te chu 'joint winner' an ni ang. Three Lions hi ruahsur vangin tun inelnaah an buai tawh a, Australia nen ruahsur vangin an inhnehtawk. England hian Ireland an hneh lo a, hemi ṭum hian ruahsur vangin Duckworth-Lewis-Stern hman a ni.

Pakistan erawh ruahsur vangin an la buai lo a, khelmualah erawh hun harsa bik an paltlang. Inelna ṭantirhah Shaheens hian India leh Zimbabwe te an hneh lo a, hemi hnu hian match thum chak zawnin Netherlands puihna nen semifunal an thleng.