MPL semifinal inchuh boruak a hot

Zote Honda MPL9-ah nimin tlai khan Chhinga Vengin Chanmari FC 1-0 in an hneh a, a sang pali zingah an inhlangkai. Nizan khan an elpui FC Venghnuai leh Chawnpui FC te an inkhel a, result kan hre hman lo.

Chhingcows leh Chanmari danglamna chu penalty a ni a, minute 78-naah Jerry penalty hlawh chu Johny Lalremruata'n goal-ah a chantir. Tualchhung football-a thilmak tak chu Chanmari hian Chhingcows hi hneh an harsat.

September 17, 2016 khan Chanmariin 4-1 in Chhinga Veng an hneh a, Vanglaini chuan 'Chhinga Veng chetsual Chanmari chakna' tih thupui a hmang. Hemi hnu hian Chanmari hian Chhingcows hi an hneh leh tawh lo.

November 10, Ningani zan khan Aizawl FC-in 7-2 zetin MPL kaithar FC Bethlehem an sawp a, Chanmari hian table mawngphah chhuahsan theihna remchang nei mah se an hmang ṭangkai thei lo.

Chanmari leh Bethlehem te hi league match tawp berah an inkhel dawn. Round 13-ah FCB hi an chak a, Chanmari hi an chak lo a nih ngawt loh chuan league match hnuhnung ber inkhel boruak hi a sang dawn.