Man United-in Villa lakah phuba an la

Manchester United-in kawrtawp Premier League-a an hneh loh Aston Villa chu Ningani zan khan League Cup third round-ah an hmachhawn a, 4-2 in an hneh. Erik Ten Hag-a hote hian last 16 an lut a, Championship club Burnley an hmachhawn ang.

Dutch manager Ten Hag-a'n squad siksawi hretin goalkeeper Martin Dubravka khelhna hun a pe a, bul ṭantu zingah kar tawpa bench lama awm Bruno Fernandes leh Harry Maguire te an rawn let thung. Unai Emery pawhin squad a siksawi nual, first keeper Emiliano Martinez aiah Robin Olsen a lut a, Ashley Young pawh a club hlui hmachhawn turin bul a ṭan bawk.

Man United-in game nung tak an pho chhuak a, chutihrualin first half-ah goal hmuh tur a awm lo. Second half-ah Villa-in an khung hmasa zawk a, Jacob Ramsey thawhrah sengin Ollie Watkins-a'n minute 48-naah a khung.

Second rei lote hnuah Diogo Dalot-a ball pass ṭha chu Bruno Fernandes-a'n umlutin Portuguese midfielder cross ṭha zet chu goal ruakah Anthony Martial-a'n a khung lehnghal.

United dinhmun a ṭha rei lo. Minute 61-naah Young-a'n cross ball ṭha chu Leon Bailey-a'n tauhin Dalot-a ke a per a, Villa-in 2-1 in hma an hruai. Mahse, United-in tlawm nawn an tum lo. Marcus Rashford-a'n box chhungah a theihna pholangin minute 67-naah siphurh a sut lehnghal.

Argentine rawlthar Alejandro Garnacho hun a thleng. Bench aṭanga lut kum 18 mi Garnacho hian minute 78-naah keeper Olsen-a ball pet chhuah sual chu changin Fernandes a pe nghal a, Fernandes-a'n goal-ah a chantir.

United an phur zel. Injury time-ah Garnacho ball fing chu Scott McTominay-a'n a tlawh goal. Ten Hag-a hote 4-2 in an chak. United tan League Cup nomawi beiseina chhit nunin a awm a, Emery hote Villa lakah phuba an la bawk.

Dutch manager Ten Hag chuan, "A rilru put hmang a zir a ni mai. Tuna a rilru put hmang ang hi a put a, nitina hmasawn a duh a, a nundan hmang a dik a nih chuan sang tak a thleng thei a ni. Player danglam bik a ni a, defence khauh ṭha tak pawh a su hawng thei a ni," tiin Garnacho a fak.