Nadal leh Djokovic awm dun lo

ATP Finals khel tur a chiang tawh a, an awmna tur group pawh tihfel a ni. Champion tura rinkai Rafael Nadal leh Novak Djokovic te chu group hranah dah an ni a, semifinal hma chuan an inhmachhawn thei dawn lo.

A vawi nga nan Nadal chu seeded pakhatna a ni, world number 1 Carlos Alcarez a inlan theih loh avangin a chung berah Nadal hi a awm. Green group-ah Casper Ruud (3) Felix Auger-Aliassime (5) leh Taylor Fritz (8) te nen an awm.

Red group lamah Stefanos Tsitsipas (2) Daniil Medvedev (4) Andrey Rublev (6) leh Novak Djokovic (7) te an awmkhawm thung, group pakhata awmte hi an inkhel kual vek dawn, chumi hnuah a sang pahnihin semifinal an lut ang.

Spanish star Nadal-a'n Grand Slam nomawi ringawt pawh 22 a nei tawh a, ani aia champion hnem an awm lo. Mahse, season tawpa a thiam pariat inelnaah hian a la champion ngai miah lo, a record ti ṭha zual turin vawi khat tal champion theih chu duhthusam a ni.