Real-in Barca an hnaih hret

La Liga champion lai Real Madrid chuan Barcelona an kal fal tir duh bik lo. World Cup hma an match hnuhnung berah Real hian Cadiz chu 2-1 in an hneh a, an hmelma leh hmahruai mektu Catalan club nen an inkarah point hnih chiah a awm.

Spain khawpui Madrid-a inkhelah, mualneitu Real lamin Eder Militao leh Toni Kroos te hmangin an khung a, hun tawp dawnah Cadiz tan Lucaz Perez chuan goal khat khung ve mah se awmzia a nei phak tawh lo.

Hnehna changtu Real hian La Liga match 14 aṭangin point 35 an nei a, an chungah point 37 neitu Barcelona an awm thung, match khat chetsual hleka dinhmun inthlak thei reng an la ni. Chak lo Cadiz erawh a hniam ber dawtah an la awm thung.

World Cup hmain La Liga an khel dawn tawh lo. Spanish football inelna sang ber hi December 31-ah an khel ṭan leh chauh ang, kum hlui thlah niah an lo kir ve leh chauh dawn tihna a ni.