Ronaldo awmna Portugal

12th November, 2022

Cristiano Ronaldo hoin Portugal an inlan dawn, an ram mipui bakah Mizo zingah pawh Ronaldo awmna ram ṭantu an tam dawn. Player ṭha an ngah avangin a vawi khat nan World Cup champion nih an tum ngam ang.

Manchester United tan Ronaldo hian season a hmang ṭha lo, inelna hrang hrangah match 16 a khel tawh, heng zinga match 10-ah inkhel bul ṭanin, goal thum a khungsak tawh, ama nihna aṭanga teh chuan season ṭha lo tak a ni.

Mahse an ram captain a ni a, coach Fernando Santos pawhin a chungah rinna a nghat. Santos chuan, "Portugal tana hlawhtlinna chan duh, World Cup champion nih châka tuihalte ka ko, chung zingah chuan Ronaldo pawh a tel," tiin a sawi.

Ronaldo khelhpui turte hi Premier League lama player langsar an tam. Man United tana a khelh pui Bruno Fernandes leh Diogo Dalot te an ni a, Manchester City player pawimawh Joao Cancelo, Ruben Dias leh Bernardo Silva te an awm bawk.

Koh loh zingah Paris St-Germain midfielder Renato Sanches chu hming langsar a ni a, senior player Wolves midfielder Joao Moutinho leh Goncalo Guedes te hming pawh a lang lo, anni an hnawl thei a nih chuan an squad a chhah tawk tih a chiang.

Portugal hi group H-ah Uruguay, Ghana leh South Korea te nen an awm, match hmasa ber atan November 24 hian Ghana an hmachhawn dawn a ni.

Portugal Squad:
Goalkeepers: Diogo Costa (Porto), Rui Patricio (AS Roma), Jose Sa (Wolverhampton Wanderers)

Defenders: Joao Cancelo (Manchester City), Diogo Dalot (Manchester United), Ruben Dias (Manchester City), Raphael Guerreiro (Borussia Dortmund), Nuno Mendes (Paris St-Germain), Pepe (Porto), Danilo Pereira (Paris St-Germain), Antonio Silva (Benfica)

Midfielders: William Carvalho (Real Betis), Bruno Fernandes (Manchester United), Joao Mario (Benfica), Ruben Neves (Wolverhampton Wanderers), Matheus Nunes (Wolverhampton Wanderers), Otavio (Porto), Joao Palhinha (Fulham), Bernardo Silva (Manchester City), Vitinha (Paris St-Germain)

Forwards: Joao Felix (Atletico Madrid), Ricardo Horta (SC Braga), Rafael Leao (AC Milan), Goncalo Ramos (Benfica), Cristiano Ronaldo (Manchester United), Andre Silva (RB Leipzig).