North East Olympic Games hawn a ni ta ; Mizoram beiseina a sang

Hmarchhak infiammite inkhawmpui lian, 2nd North East Olympic Games 2022 chu November 10, Ningani tlai khan Meghalaya chief minister Conrad K. Sangma chuan a hawnna a nei a, SAI Complex, NEHU-ah hawnna hi neih a ni.

Conrad Sangma chuan, "Infiamna hi rilru leh taksa thlenga min tuaihriamtu a ni," a ti a, NE Olympic mei a det bakah, North East state pariat, Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura aṭanga infiammi kalkhawm mi 3,000 chuangin parade an nei bawk.

Mizoram atangin Infiammi 262-in inelna hi an hmachhawn dawn a, coaching staff leh official 73-in an ho dawn bawk - football bik hi opening ceremony hmain khelh ṭan a ni tawh a, mipa football-ah Mizoram hian semifinal an lut tawh.

November 16-a neih zawh tur inelnaa hian Archery, Athletics, Badminton, Basketball, Boxing, Football, Judo, Karate, Shooting, Swimming, Table Tennis, Taekwondo, Tennis, Wushu, Cycling, Golf, Weightlifting leh Wrestling-ah te inelna neih niin, Mizoram hi inelna zawng zawngah an tel vek a ni.

Mizoram chef de mission Joseph Thansanga chuan, "Beiseina kan nei sang a, medal tam tak nen Mizoramah kir theih kan inbeisei. A bik takin mipa football, mipa basketball, tennis leh badminton-ah te hian beiseina kan nei sang leh zual a, kan medal hlawhchhuah that vena turah kan ngai a ni," tiin Vanglaini a hrilh.

North East Olympic Games vawi khatna chu kum 2018 khan Imphal, Manipur-ah neih a lo ni tawh a, hemi tum hian inelna hrang hrang 18-ah intihsiakna neih niin, a thlengtu Manipur chuan medal 159 (80 gold, 48 silver leh 31 bronze) lain pakhatna an ni a, Mizoram chuan medal 52 ( 8 gold, 15 silver leh 29 bronze) lain palina an ni.

Joseph Thansanga chuan, "North East Olympic hmasa zawka kan record hi kan khum theih kan beisei a ni, " a ti a, Mizoram tan beiseina a nei sang hle.

NE Olympic Games vawihnihna hi ruahmanna hmasaah chuan Arunachal Pradesh thlen tur a ni a, mahse, Covid-19 hri leng karah an inbuatsaihna a that tawk loh avangin Meghalaya khawpui Shillong-ah nghah a ni a, Meghalaya State Olympic Association (MSOA) chuan kum 50 state an nih lawmna ni pah fawmin an thleng a ni.