Cycling-ah Mizo hming a mawi

Shillong-a North East Olympic khelh mekah, nimin khan Mizoram chuan bronze medal pahnih an la a, Zemabawk North tlangval Mesak Vanlalvena chuan Elite Men-ah bronze lain, Tuirial rawlthar Vanlalruata chuan Junior XCO-ah bronze medal a la bawk.

Mizoram hian cycling-ah hian Junior, elite men, downhill leh road (open) ah te inelna hi an hmachhawn a, downhill leh road inelna hi an la hmabak a ni.

Mizoram Cyclist team manager Lalrinfela (Tekawka) chuan, "A nihna takah chuan junior-ah hian medal kan beisei lo a, bronze hial kan la hi a lawmawm a, kan tan chuan hmasawnna a ni, " tiin Vanglaini a hrilh.

Tekawka chuan, "Elite Men-ah hian gold hial kan beisei a, kan beisei angin a thleng ta lo zawk. Mahse, Mesak-a hian hliam nei chungin inelna a hmachhawn a, tlanchhuah hrim hrim kan tum a, bronze a la thei hi a lawmawm, " a ti.

Mesak hi inelna neih hma, Ninganiah a accident a, a mit leh a biang vei lamah hliam tuarin, a khaw hmuh a fiah lo. Tekawka chuan, "Nilengin civil hospital-ah hun kan hmang a, kan tum angin thil a kal lo, " a ti a, inelna hmabakah beisei an la neih thu a sawi bawk.