Zenit panin Lovren a chhuak

Russian Premier League club Zenit St Petersburg chuan Liverpool defender Dejan Lovren chu pound maktaduai 10.9-in an lalut a, kum thum chhung atan contract an ziahpui. Kum 31 mi Lovren hian July 2014 khan Southampton aṭangin Liverpool hi pound maktaduai 20-in a zawm a, Reds-a pan tirh lamah player pawimawh ni mah se tun hnaiah hliam vangin beisei angin hmun a chang lo. 

Season hmasa khan inelna hrang hrangah match 18 khelin Champions League nomawi a chawi a, tun season-ah hliam vangin match 15 chiah a khel bawk. Liverpool manager Jurgen Klopp chuan, "Liverpool legend nichungin min chhuahsan a, October 2015-a he club ka zawm tirh aṭang khan ka tan chuan player pawimawh tak a ni nghal a ni," a ti. 

Lovren hian April 2016-a Borussia Dortmund nen Europa League quarterfinal second leg-a 4-3 a Dortmund an hneh ṭumin injury time-ah chakna goal a khung a, inkhel pahnih belhkhawmah 5-4 in an chak phah - Kop hoin hei hi an theihnghilh thei lo ang. World Cup 2018-a Croatia final luhpuitu Lovren hian Reds-ah hian June 2021 thleng contract a nei a, a ṭul dan a zira kum khata pawhsei theih a ni bawk. 

Liverpool hian Premier League season zawh hma khan nakkuma free transfer-a a chhuah mai loh nan Lovren contract pawhsei hi an ngaihtuah hman a, mahse Zenit an lo lan takah chuan chhuahtir a ni ta zawk. Lovren hi Liverpool player pawimawh Mohamed Salah nen inkawmngeih tak an ni a, Klopp chuan, "Mo-a best friend chu tu nge ni ta ang? tiin kan inzawt a ni," tiin fiamthu a thawh zui. 

Mo Salah chuan, "Ka ṭhian, sawi tur tak pawh ka hre lo a, ka awm dan pawh ka sawi thiam lo. Kan ngai dawn takzet che a, a bik takin ka ngai zual dawn che a ni," tiin a ṭhian hi a thlah a, club tana a hnathawh avangin lawmthu a hrilh bawk.