Vawiin aṭangin I League

India rama football inelna lian I League chu vawiin aṭangin khelh ṭan a ni dawn a, tlai dar 4:30 hian Payyanad Stadium, Manjeri-ah Gokulam Kerala leh Mohammedan SC ten an khel ṭan ang.

I League match hmasa berah hian presdident Kalyan Chaubey, secretary Shaji Prabhakaran leh League Committee chairman Lalnghinglova Hmar (Tetea Hmar) ten an telpui ang.

Tun season I League champion hian kum tharah Indian Super League an khel dawn a, hemi a nih avang hian inelna hian ngaihhlut a hlawh sawt dawn.

Team 12 an inel dawn a, chungte chu Aizawl FC, Churchill Brothers, Gokulam Kerala, Mumbai Kenkre, Mohammedan, Neroca, RoundGlass Punjab, Rajasthan United leh Real Kashmir, Sreenidi Deccan, Sudeva Delhi leh Trau te an inel dawn.

Inelna hi 'home leh away' a khelh tur a ni a, Aizawl FC pawhin November 15,Thawhlehni hian RG Stadium-ah Trau an mikhual ang. Mizo club hi Mizoram Premier League-ah hmahruaitu an ni mek a, chutihrualin MPL-ah an foreigner-te an chhawr lo.

I League-ah erawh foreigner nen player kimin Manipur club hi an hmachhawn ang.

Vawiin Inkhel Tur
Gokulam Kerala 4:30 PM Mohammedan SC
November 13, Pathianni
Neroca 4:30 PM Real Kashmir
November 14, Thawhṭanni
Sudeva Delhi 4:30 PM Kenre
RoundGlass Punjab 7:00 PM Sreenidi Deccan
November 15,Thawhlehni
Aizawl FC 4:30 PM Trau
Churchill Brothers 7:00 PM Rajasthan FC