Belgium tan Hazard leh Lukaku

Hliam vangin Romelu Lukaku-a'n tun season chhungin match a khel tam lo, tun din­hmunah pawh malpui hliam vangin a dinhmun a chiang lo mek. Duhthusama dam ni rih lo mah se Inter Milan striker hi World Cup khel tur Belgium squad-ah telh a ni.

Roberto Martinez-a'n tun hnai khan, "A hmun ruak hnawh khah theih a ni lo," tiin Lukaku pawimawhna a lo sawi tawh. Football inelna ropui berah a striker ṭha hruai ngei a tum a, a tum angin a hruai dawn bawk.

Kum 29 mi Lukaku hian Red Devils tan match 102 a khelh aṭangin goal 68 a khung tawh, an ram tana goal khung hnem ber a ni. A tan chuan kumin hi World Cup bikah chuan a hun ṭha hnuhnung pawh a ni ve thei.

Belgium hi captain Eden Hazard hoa inlan tur an ni dawn. Hazard hi Real Madrid a pan hnua beisei la phak lo ngar ngar a ni, hliamin a tih buai nasat chu thuhran ni se, a hliam dam hnuah pawh hmun nghet a chang phak rih lo.

Coach Martinez erawhin Hazard chungah rinna a nghat ngam tlat a, a laka beisei an neih ang pek let theihna remchang a ni ang. Chelsea jersey a hak lai hrechiangtu tan chuan a laka rinna nghah ngam hi thil mak a ni lo ang.

Kevin de Bruyne chu Belgium tana changtupa ni thei tur a ni. Manchester City midfielder hi Pep Guardiola nen an thawh­dun hnuah a hriam lehzual a, season a hman ṭhat bawk avangin Qatar World Cup-ah hian player en hlawh bik a ni dawn.

Belgium hi group F-ah Canada, Morocco leh Croatia te nen an awmkhawm. An match hmasa ber atan November 24, Ningani hian Canada an hmachhawn ang.

Belgium Squad:
Goalkeepers: Koen Casteels (Wolfsburg), Thibaut Courtois (Real Madrid), Simon Mignolet (Club Brugge).
Defenders: Toby Alderweireld (Royal Antwerp), Zeno Debast (Anderlecht), Leander Dendoncker (Aston Villa), Wout Faes (Leicester), Arthur Theate (Rennes), Jan Vertonghen (Benfica), Thomas Meunier (Borussia Dortmund), Timothy Castagne (Leicester)
Midfielders: Kevin De Bruyne (Man­chester City), Amadou Onana (Everton), Youri Tielemans (Belgium), Hans Vanaken (Club Brugge), Axel Witsel (Borussia Dortmund), Yannick Carrasco (Atletico Madrid), Thorgan Hazard (Borussia Dortmund)
Forwards: Michy Batshuayi (Fenerbahce), Charles De Ketelaere (AC Milan), Jérémy Doku (Rennes), Eden Hazard (Real Madrid), Romelu Lukaku (Inter Milan), Dries Mertens (Galatasaray), Lois Openda (Lens), Leandro Trossard (Brighton)