EnglishTan Finale

Infiamna khawvelah season tluana league-a inkhelh kualna chiah hi chuan, team ṭha leh tlo an ding chang ṭhin. Knockout tournament, hun bik nei chhunga huaihawt ṭhinah hi chuan, ṭhat leh tlo a tawk lo - vanneih leh chet fuh ni inherfuh leh fuhlohin kawngro a su nasa ṭhin hle.

ICC T20 World Cup Finalist tur te a hriat ta a, England leh Pakistan (EnglishTan) ten nomawi an inchuh dawn. England hi tun tournament-a sawiselbo khawpa saipui kallai ang maia hma zawna mite tukzal zel ang mai an ni a, Pakistan hi tluk leh din leh thilmak leh team dangte result a innghat chunga, finish line rawn bawkvak thleng an ni thung.

Pathianni tlai dar 1:30 hian Melbourne Cricket Ground-ah nomawi inchuhna hmuhnawm thlir tur a awm ang.

Vawr dik, thlang sual
Nilaini, Sydney khuaa inkhelah, ṭhum vawrawh Kiwis Captain Kane Williamson a vannei a, tawnhriat nei ṭha captain Williamson hian vuak hmasak a thlang mauh mai. Williamson meuh pawhin thutlukna a siam sual ve thei a, hun pawimawh berah a thlangsual ta thung?

Kane Williamson an vuak hmasak a thlan chhan hi tun thleng hian, kei tehlul hian a chhan awmang ka la hre fuh hleithei lo. Khata ṭang kha chuan 'one way traffic' a ni chho nghal a, tun World Cup chhung zawnga mit la la lemlo tak Babar Azam a leh a pawlten advance Krismas thilpek an dawng a ni ta ringawt. "Final kan luhtir che u anga, in confidence kan lo tihṭhatsak ang che u," an ti ta emaw tih mai tur a ni.

Infiamna nunrawng
Ningani tlaia Adelaide Oval-a India leh England intum erawh, tun tournament a mit la pahnih an ni bawk nen, final a intum zawk awma mawi an ni. A inkhelah erawh, Rohit Sharma leh a hoten ni theihnghilhtlâk an hman lai in, an khawih apiang rangkachakah a chang ta emaw tih mai turin Jos Buttler leh a hote an khawsa ve thung.

India leh England khelh dan chu chhim leh hmar ang hlaka hrang an ni. Hamara Desh hote chu veng khat ui sual huai boh leh ngur ring em em, rampalailenga sakei tawk thut ang vel lekin an khawsa. Zep thu a awm lo, dawl zawrin an zawr a ni e.

Ṭhumvawr leh a behbawm
Tunlai cricket khelah chuan, vaw hmasa team-te tan target ṭha hi eng nge? tih hriat a har em em. A vaw hnuhnung tur te tan run 200 emaw, run 150 um ngai pawh lo nise, khami target hmachhawp awmsa a team game plan siam a, va luh hmiah mai hi a awlsam ber reng a ni.

Chik zawka han thlir chuan, tun World Cup-ah hian Virat Kohli tih loh chu, Indian player han teirei leh rintlak an awm meuh lo a, semifinal tlaiah khan Power Play laia run 38 chauh an vuak chhuah theih aṭang khan, hniam lam pan telh telh an ni tih a chiang nghal.

England ho vuak hun a thlen lahin ball pakhat mah che eih lo, timing nuam tawk tur chiaha bat a rawn sawt leh lawi si kha, England opener Buttler leh Alex Hales tan erawh maimitchhing pawn lo vai se, an duh duhnaah an vaw thei mai ang a tih mai tur a ni.

Grand Finale
Khawvel beisei leh hmuh châk, mi nuai chuang lenna Melbourne Cricket Ground-ah ngei India-Pakistan final chu kan hmu thei dawn ta lo a. Stadium ticket man a tlakhniam nghal bakah, TV lam fakna rate pawh tun dinhmunah chuan 20-30% velin a tlahniam nghal bawk.

Amaherawhchu, Pathianni chawhnu a lo inher anga, tun tournament a team ṭha ber leh khel ṭha lawrlak, world champion lai England hi rinkai zawk an ni ngei dawn. Chutihrual chuan hmakhawsang aṭanga Pakistan team an lo sawi fiamthu dan, "Vawiina a ber anga khawsa, a tuka nep ber anga awm thiam - the most inconsistent team," an tih thinna hi, tun World Cup chhung pawh hian an ze ngai an lo la chhawm reng tih erawh a chiang.

Thil pakhat erawh a chiang, ṭhumvawr a pawimawh hle ang a, tin, cricket khawvelin T20 World Champion thar a nei dawn.

- K. Vanlalruata