Mizoramin Manipur an hneh

2nd NorthEast Olympic 2022-ah Mizoram chuan nimin khan Manipur 1-0 in an hneh a, goal awmchhun hi Rohlupuia (Mapuia) khung a ni. Mizoram hian match hmasa berah Assam 6-0 in an hneh a, Manipur hneh lehin match hnihah vawi hnih chakin group hmahruaitu nichungin semifinal an lut.

Meghalaya Football Association Ground, Shillong-ah Manipur leh Manipur ten group match hnuhnung ber an khel a, Mizoramin inkhel an thunun zawk. Assam laka goal li khungtu Joseph Lalvenhima vanneih ṭum a ni lo a, chance ṭha ṭum hnih a hlah.

First half-ah goal a lut lo a, second half-ah erawh Mizoram an thiamzia an pholang. Minute 50-naah Samuel K. Vanlalpeka ball pek chu Mapuia chuan changin Hnahthial rawlthar Mapuia hian Manipur player a vir khum hnuah a ke vei lamin ṭha zetin a pet goal. Mizoram hian K. Lalrosanga hmangin khung belh thei an ni a, Lunglei College Veng rawlthar hian match zawnin a pet goal thei ta lo.

Mizoram hian November 14, Thawhṭanni chawhma dar 11:00-ah Nagaland an hmachhawn dawn. Nagaland hian inelna thlengtu Meghalaya 2-1 in hneh lo mah se Sikkim (4-0) leh Arunachal Pradesh (2-0) te harsatna nei loin an hneh a ni.