United enthlak Maddison-a'n Leicester-ah contract pawtsei

Manchester United-in midfield tih chak nana an en thlak zinga mi James Maddison chuan kum li chhung atan Leicester City-ah contract a pawtsei a, King Power Stadium-ah 2024 thleng a cham ang. Maddison hian kar khatah £110,000 vel a hlawh dawn nia sawi a ni a, English midfielder hi Foxes-ah Premier League top scorer Jamie Vardy te nen hlawh tam zinga mi an ni ang.

Kum 23 mi Maddison hian June 2018 khan Norwich City aṭangin Leicester City hi a zawm a, Foxes tan vawi 76 inlan tawhin goal 16 a khungsak a, assist vawi 10 a nei bawk. English midfielder hi Manchester United bakah Europe club ṭha nen sawi zawm ni mah se manager Brendan Rodgers nen an inkar a ṭhat avangin King Power Stadium-a cham a thlanga ngaih a ni. Maddison hi July 1-a Everton an hneh loh ṭumin a inlan a, English midfielder hi hemi hnu hian hliam vangin a inlan tawh lo. Leicester-in Maddison-a tel loin match sarih an khel a, vawi hnih chauh chakin vawi thum an chak lo. Foxes hi hun rei zawk palina chinah awm mah se season kharna inkhela Manchester United an hneh loh avangin season tharah Europa League an khel ang.