Man City leh Torres an inhnaih

Manchester City-in Leroy Sane an chan a, Pep Guardiola hoten German winger thlak nan Valencia winger Ferran Torres an lalut hnai. Kum 20 mi Spanish winger hian kum khat chauh contract a nei tawh chungin Valencia hian an player manah pound maktaduai 40 an phut nia sawi a ni.

Valencia aṭanga inzir chhuak Torres hi kum la naupang mah se La Liga-ah season thum a inlan der tawh a, season liam ta khan league-ah match 34 zet inlanin goal li a khung. Kum bithliah inelna Under 17, Under 19 leh Under 21-ah te Spain tan a inlan tawh bawk.

Man City hi season hman zawh takah pahnihna an ni a, champion team Liverpool an phak lohna chu point 18 zet a ni. Pep Guardiola hoten insiamṭhat an mamawh a, tlarhnung siamṭhat chu an hna pawimawh tura ngaih a ni.

Pep hian Covid-19 hnuah England centre-back John Stones leh Argentina defender Nicolas Otamendi te aiin kum 19 mi Eric Garcia chu Aymeric Laporte aiin a ring zawk. City hian coronavirus hnuah match 10 an khel a, Garcia hian match ruk bul a ṭan laiin Stones leh Otamendi ten match hnih leh match thum chauh bul an ṭan.

Champions League khelh tur a la awm avangin kumin season hi August thla chawhnu lamah a tawp dawn chauh a, September 12-ah season ṭan lehnghal tur a nih avangin City director of football Txiki Begiristain chuan nipui transfer chu sawi lawk theih a nih loh thu a sawi.