NT-a tan WBC Asia title a hnai

Mizo boxer hriat hlawh NT Lalbiakkima chu Seoul, South Korea-a WBC Asia title hmachhawn turin tihchian a ni hnai ta a, Siaha tlangval hian September 18-ah inhnek a hmachhawn theih ngei a beisei thu Vanglaini a hrilh.

Korea Boxing Organization chuan September 18 khian WBC Asia title match buatsaih turin hma an la mek a, heavyweight, featherweight leh light flyweight-ah inhnek buatsaih an tum. Hetih rual hian KBO tan mahni duhthua inhnek hi buatsaih ngawt theih a ni lo a, World Boxing Council lamah an duhna hi an thlen tawh. Vanglainiin WBC hnena KBO lehkhathawn a hmuhah chuan NT Biakkima hming tarlan tel a ni a, light flyweight-a inhnek turin an ti. 

NT-a hian May khan professional boxing a luhchilh hnua a vawi khat nan July-ah inhnek a hmachhawn theih mai theih tawh thu Vanglaini hrilh a, mahse Covid-19 vanga boruak chiang lo karah ṭhulh a ni. September-a inhnek turin hmalak a ni leh ta a, hei pawh WBC-in a pawmpui phawt a ngaih avangin chiang taka sawi theih a la ni lo. NT-a chuan, "Ka manager-te pawhin theihtawpin hma an la a, thil chiang tak sawi theih a la ni lo.

"Round 10 inhnek nghal tura tih ka ni a, ka tan chuan a hautak dawn hle. Asia title a nih avangin ka hmachhawn tur pawh an hrawl dawn a, duhthlan dan tur hriatthiam a la harsa rih," tiin Vanglaini a hrilh. NT-a hmachhawn tur hian Thailand leh USA boxer lam thlan phawt an ni - an record erawh Siaha tlangval tan a la 'u' deuh. US boxer hi vawi 26 inhnek a hmachhawna vawi hnih chiah tlawm a, vawi 24 chak thei a ni - Thai boxer hian vawi 14 inhnek a hmachhawnah a khingpui a knockout vek bawk. South Korea-a cheng mek NT-a chuan, "China lam boxer pawh biak mek a ni a, ani hi boxer chhawp hmasak pahnih aiin a record a nau deuh," tiin Vanglaini a hrilh.