Chanmari kutah Dinthar hmalam ; Mangṭha zan nge Bye Bye zan?

Mizoram Premier League champion hmasa ber Dinthar FC chuan Mizoram football inelna sang ber an khel zel dawn em tih chu zaninah a hriat theih dawn. Maimawms hian zanin dar 7:30-a Chanmari FC laka point thum an hmu lo a nih chuan an relegate ang.

Bye bye
MPL ṭan tirh aṭanga club inel bera ngaih chu Chanmari FC leh Dinthar FC an ni a, Mi­zo­ram Premier League tingaih­nawmtu an ni.

Club pahnih chanchina theihnghilh theih tawh loh tur chu MPL2 league round hnuhnung ber a ni. Chanmari FC-in point 32 an hmuh tawh avangin pakhatna an ni chiang tawh a, Dinthar FC-in point 26 hmuin final lut turin chak an mamawh thung.

April 24, 2014 zanah Lam­mual khat tlat mipui hmaah Dinthar leh Chanmari hi an intawng ta a. Coach H. Vanlal­thlanga'n final atana in dah ṭha loin an theihna zawng zawng an chhuah a, football hmuhnawmna pho chhuakin minute 90 a zawh chuan 5-4 in Chanmari an chak.

Team pahnih hian injury time-ah goal an khung ve ve a, referee-in hun tawp ham rik a ham thlengin inkhel a hmuh­nawm. Chanmari mipui 'Dinthar bye-bye, Dinthar bye-bye, Dinthar bye-bye ...' tiin an au rual a, hemi ṭuma mittui leh boruak awm dan erawh a tawngtu chauhin an hrethiam pha ang.

'Bye bye' tih hi in deusawh­na anga ngaih theih a ni a, Chanmari hian final khel pha lo tur Dinthar an 'bye bye' a, tun ṭumah hian Maimawms hi MPL aṭangin pet chhuak ta se an 'bye bye' thei a, chutihrualin a nghawng a len avangin zah takin an 'mangṭha' thei bawk. Eng pawh chu ni se zanin hi MPL chanchina hun pawimawh a ni.

Dinthar hi...
MPL ṭan a nih khan Mizo­ram Football Association chuan first division champion lai Dinthar FC, Luangmual FC leh FC Kulikawn te bakah Police team pahnih 1st Bn MAP leh 3rd Bn MAP te chu Mizoram Police-ah chhung khawmin Mizorama league sang ber khel turin an tlintir nghal.

Luangmual leh FC Kuli­kawn te MPL aṭangin an relegate tawh. Mizoram Police erawh an relegate hnuah an tho chhuak leh a, semifinal hial an thleng thung.

Dinthar FC hian Luangmual leh Kulikawn hnung zui an duh lo a nih chuan Chanmari hi an hneh a ṭul dawn a, an chak a nih pawhin Zirtawpni tlaiah Bethlehem Vengthlang FC-in Chanmari West an hneh sak a ṭul bawk ang.

Beisei a bo?
Dinthar FC hian Lungleia Chanmari West an hneh hnuah an la chak lo vek a, an match hnuhnung bera Mizoram Police an hmachhawn ṭumin goal ruk an chhuah a, hemi hma hian Aizawl FC lakah goal li an chhuah leh tawh bawk.

Maimawms hi an match hnuhnung lam thlir chuan an beidawng tawhah a ngaih theih a, amaherawhchu MPL club hlun ber zinga mi Dinthar FC hian an hming mawina pho chhuak leh turin vawi khat chu an theihna zawng zawng nena minute 90 chhung an khelh leh beisei a ni.

Chanmari FC lam erawh semifinal atan an inbuatsaih dawn. Coach H. Vanlalthlanga chuan, "Player ṭhenkhat ka enchhin dawn a, chutihrualin chak tumin kan khel dawn. Semifinal atan inpuahchah a ṭul a, defender Rosanga pawh match fitness nei turin a inlan leh thei tawh ang," tiin Vanglaini a hrilh.