Tlai ni nêmah Chhinga Veng leh Police
Mizoram Premier League Season 6-ah Chhinga Vengin Mizoram Police 4-1 in an sawp tawh a, vawiin tlai dar 3:00 hian an intawng leh dawn a, an intawn hmasak ang ngawt chu a ni tawh lo ang.
Police hian coach thar Lalbiaksanga Colney kaihhruaina hnuaiah match kua aṭangin point 19 an hmu a, table mawngphah aṭangin pathumnaah an invawrh chho a, league hmahruaitu Chhingcows nena an inkhel tur hi a hmuhnawm khawp ang.
Inkhel nghawng
Chhinga Vengin point 30 an hmu tawh a, league hmahruaitu an ni chiang tawh. Table
aṭanga thlir chuan vawiin inkhel result vang hian Lalsangzuala Hmar hote dinhmun a danglam phah dawn lo.
Mizoram Police tan erawh match pawimawh tia sawi theih a ni a, vawiina hnehna an chang a nih chuan pathumnaah league round an khar ang a, pahnihna Aizawl FC nen semifinal-ah an inhmachhawn ang. Police hi an chak loh erawh chuan Chhinga Veng bawk hi semifinal-a an hmachhawn theih dan a awm a, amaherawhchu Chhingcows nge AFC hmachhawn châkawm tih chu zawhna chhan har tak a ni.
Vawiin tlaia an inchuh tur tak erawh 'inrintawkna' a ni a, hnehna chang chunga league round khar chuan inrintawkna nen semifinal an hmachhawn thei ang.
Ṭhat dan berin?
Mizoram Police-in hrem vangin captain V. Lalṭanpuia an chhawr thei dawn lo a, hrem vangin bawkin Chhinga Vengin captain Lalrinchhana Tochhawng an hmang thei dawn lo. Chhingcows hian hliam vangin midfielder pawimawh R. Malsawmtluanga an hahdamtir a ṭul dawn a, player pawimawh dang erawh an inlan vek ang.
Police coach Lalbiaksanga Colney chuan, "Pathumna nih hrim hrim hi kan tum. Semifinal kan luh tawh vangin kan inthlah dah dawn lo. Kan pute an tui em em a, fans lam pawh an phur a, result ṭhaa thungrulh kan duh a ni," tiin chak an tum thu Vanglaini a hrilh.
Chhinga Veng coach Lalsangzuala Hmar chuan, "Tute nge kan tum theih tih lam hi kan ngaihtuah a ni lo. Keini chuan kan hmachhawn tur apiang a ṭha thei ang bera hmachhawn hi kan duh dan a ni a, chak tumin kan khel dawn," tiin an inthlahdah loh tur thu a sawi.
A chhehvel
MPL6 ṭantirha top scorer tura rinkai chu Malsawmfela a ni a, Ramhlun South tlangval hian phase 1-ah goal ruk a khung tling tawh. Sawmfela hi Mizo striker zinga theihna nei sang zinga mi ni mah se MPL-ah top scorer a la ni lo a, tun season-ah pawh a dinhmun a derthawng leh tawh.
Ramhlun South tlangval Sawmfela hian round 7 hnuah goal a la khung leh lo a, hei vang hian Mizoram Police striker Lalfakzuala leh F. Lalrinpuia ten an lehpel tawh. Armed Veng tlangval Fakzuala hian match hnuhnung berah hattrick siamin goal 9 a khung tawh a, Republic Veng tlangval Valpuia hian goal sarih a khung tawh bawk.
MPL6 - Round 14
Vawiin Inkhel Tur
3:00 PM Chhinga Veng Vs Mizoram Police
7:30 PM Chanmari FC Vs Dinthar FC
November 17, Zirtawpni
3:00 PM Chanmari West Vs Bethlehem VT
7:30 PM Aizawl FC Vs Ramhlun North