Federer-a'n semifinal a lut

Roger Federer chuan rawlthar duhawm Alexander Zverev hnehin ATP World Tour Finals khelh mekah semifinal a inhlangkai. Swiss thiampuipa Federer hi knock out round lut thei hmasa ber a ni.

Thawhlehni zan khan O2 Arena, London-ah group match khelh niin vawi ruk champion tawh Federer hian kum 20 mi Zverev lakah hian 7-6 (8-6), 5-7, 6-1 in hnehna a chang. Federer hian group match hnuhnung bera Marin Cilic a hmachhawn hunah chuan nuamsa takin a khel thei tawh dawn tihna a ni.

Kum 36 mi Federer chuan, "Vanneih vanga chak ka ni, min chhaih buai hneh takzet. Zverev hian kawng hrang hrangin player dangte aia ṭhat bikna a nei a, kum naupang te ni chungin world number 3 a ni thei der tawh, hmabak eng tak a nei a ni," tiin German rawlthar a dah sang thiam hle.

Boris Becker Group inkhel dangah American tlangval Jack Sock chuan US Open champion hlui Marin Cilic chu 5-7, 6-2, 7-6 (7-4) in a hneh ve bawk. Sock hi a match hmasaah Federer lakah a chak lo a, match hnuhnung berah Zverev nen Federer-a hnungzuitu zawk nih an inchuh ang.

ATP Finals-ah hian world ranking-a a sang pariat chin an inel ṭhin a, kuminah hian Novak Djokovic, Andy Murray leh Stan Wawrinka te chu hliam vangin an inlan thei lo. World number Rafael Nadal pawh a match hmasa bera a chak loh hnuah khup hliam vangin a inhnukdawk tawh bawk a ni.