MVA Invitation-ah BSF leh ARC

Tualchhung volleyball inelna ngaihhlut Mizoram Volleyball Association (MVA) Invitation Volleyball Tournament chu November 21, Thawhlehni aṭangin Tuikual Indoor Stadium-ah khelh ṭan a ni dawn a, state pawn aṭangin BSF M&C leh ARC Shillong te chuan an inlan theih tur thu an tichiang tawh.

MVA Invitation Tournament 2015 khan ARC Shillong an rawn champion tawh a, kuminah pawh tualchhung player tana inzirna ṭha a awm leh dawn. ARC coach RK Singh chuan kuminah hian Manipur leh Kerala aṭanga player ṭha an lakluh avangin champion tuma an inlan tur thu a sawi.

BSF M&C Frontier te hi vawi li an rawn inlanna tur chiah a ni. Season dangah beisei anga ṭha ni lem lo mah se 2017 All India BSF Frontier Volleyball Tournament-ah pahnihna niin hma an sawn hle, Mizoramah an chhe thut lo ang.

MVA-in a sawm zinga team pakhat GTC Shillong pawhin Invitation Tournament hi khelh ngei an tum a, thuneitu lam chuan inlan ngei an tum thu sawi mah se 100% erawh a la ni lo. October thla khan GTC hian ARC hnehin Meghalaya Volleyball Tournament nomawi an chawi a ni.