Russia-ah goal a sur

World Cup 2018 thleng tur Russia chuan Thawhlehni zan khan friendly match khel turin Spain an mikhual a, team pahnih hi goal thum ve ve khunga inhnehtawkin goal ruk ngawt a lut.

St Petersburg-a inkhel-ah hian Barcelona defender Jordi Alba chuan minute kuana lekah goal hma-hruai a khung a, Real Madrid captain Sergio Ramos chuan minute 35-naah penalty hmangin a chhunzawm ve leh bawk.

Awlsam takin Spain an chak dawn nia a lan hnuah mualneitu team an harh a, Fyodor Smolov leh Aleksey Miranchuk ten an si phurh an sut. Spain tan Ramos-a'n penalty hmang vekin an goal thumna khung leh mah se Russia-in tlawm an duh lo a, Smolov chuan an si phurh a sut leh a ni.

Russian Premier League club Krasnodar tana tun season league match 10 a khelha goal riat khung thei Smolov hian hattrick siamna remchang a nei a, mah se Manchester United goalkeeper David de Gea chuan ṭha zeta lo dangin kum 27 mi striker hmingṭhatna tur a thai bo sak.

Spain tan 2014 World Cup-a Netherlands laka 5-1 ngawta an tlawm hnua minute 90 chhunga goal an chhuah leh hnem ber ṭum a ni a, hetihrual hian kumina match 10 an khelh tawhah tlawm hmel an la hmu lo zel tihna a ni.