World Cup khel tur Australia

Honduras beiseina tihtawpin a awm a, Australia-in World Cup an khel dawn thung - Nimin khan inter-continental playoff-ah Australia chuan Honduras an mikhual a, Mile Jedinak-a hattrick hmangin an mikhual hi 3-1 in an lo hneh a, kum 2018-ah Russia an pan dawn.

San Pedro Sula, Honduras-a ram pa­hnih an intawn hmasak ṭumin goal khung loin an ṭin a, Nilainiah erawh engkim tih danglamin a awm ta. Australia-in an mual­ah team ṭha an ni tih an pholang a, mittui nen Honduras an kir a, Australia-in a zawna a ṭum li nan World Cup an khel dawn thung.

Hattrick hero

Kum li danah World Cup khelh a ni a, Italy leh Netherlands-te meuh pawhin hmun an chan phak lohna tournament hi ram tinin khelh an chak a ni. Australia-in phurna leh zamna nen Honduras an hmachhawn a, Honduras-in World Cup inpetkai turin goal khat chauh pawh an khung chuan an dinhmun a ṭha dawn tih hre chungin an khel.

Mahse, Honduras beisei loh lam aṭangin goal khung turin defensive midfielder Mile Jedinak a inlar a, Australia captain hian minute 53-naah goal hmahruai a khung. Aston Villa player hian freekick aṭangin an goal hmahruai hi a khung a, Henry Figueroa a per hnuah a lut. Ram pahnih intawn hmasaka hliam vanga khel thei lo Tim Cahill chuan goal hmahruai an khung hnu lawkah bar a tauh per bawk.

Australia = penalty

Honduras-in theihtawp chhuahin an si phurh sut tum mah se minute 70-naah Bryan Acosta chu penalty area-ah a handball a, Socceroos tan a pet turin goal hmahruai khungtu Jedinak bawk a rawn pen chhuak; kum 33-a upa tawnhriat nei ngah midfielder hian goal-a chantir turin harsatna a nei lo a, Honduras tan beisei a bo tawh.

Mikhual team an talbuai tawlh tawlh a, Jonny Palacios-a'n Robbie Kruse a tihtluk avangin penalty a chawi ve leh a, Jedinak bawk lo pen chhuakin hattrick siam nan a khung. Honduras-in hun pek belhah Maynor Figueroa hmangin goal khat khung ve mah se awmzia erawh a nei hman tawh lo a, Honduras mipui mittui luang tur a dang zo lo.

Postecoglou thukhawchang

Australia boss Ange Postecoglou chuan, "A hlimawm takzet a ni. A kawng harsa zawng zawhin World Cup khel turin kan tling a, mah se dik taka sawi chuan Russia pan hi kan phu a ni. Players, staff, fans leh Aussie FA te ka lawmpui a ni," a ti a, chawlhlawk laia a naute hnena a thuchah sawi lang nghalin, "Beidawng suh u. An tlawm mai dawn lo a, theihtawp kan chhuah a ngai. Kan beidawng thiang lo tiin ka hrilh a ni," a ti.

A dinhmun derthawng anga sawi boss chuan Russia-a Australia a hruai dawn leh dawn loh an zawhna chu chhangin, "Tuna ka tih tur awmchhun chu World Cup kan khelh dawn avangin zaninah chuan hlim takin ka lawm phawt ang. Ka nupui hmeltha tak, ka ṭhian leh ka chhungte pawhin an kianga hlim taka he hun ka lawm hi an phu a ni," tiin hmalam hun a la ngaihtuah loh thu a sawi.