Southern Acers leh Mission Veng an chak

3rd Hrangbana Memorial Mizoram Badminton League-ah Siaha club Southern Acers-in Champhai Ralte Villa 4-1 in an sawp a, Mission Vengin Chanmari Evening Stars 3-2 in an hneh hram bawk.

Siaha club-in game plan fel tak an nei a, Champhai lamin MBL-a hneh loh la tawng lo Daniel S. Farid an neih avangin Southern Acers-in state pawn player Akhsit Mahajan chu men's doubles leh mixed doubles-ah luhtirin hnehna an chang nghal ve ve. M. Joseph (Men's Single) leh Lalnunhlua (Under 19) ten Siaha tana hnehna an chan zui avangin 4-0 a ni a, match tawp berah erawh rin lawk ang ngeiin Champhai player Daniel-a'n hnehna a chang.

Match hnihnaah Mission Veng leh Chanmari Evening Stars an inbei tawk. Mission Veng tan Pratul Joshi leh Lalduhawma ten men's double la nghal mah se mixed doubles-ah erawh tawnhriat ngah zawk Chanmari aiawh Lalrinzuali leh Aimson Singh ten hnehna an chang thung.

Men's Singles-ah harsatna nei loin Zarzokima'n Mission Veng a chakpui a, Under 19-ah Chanmari player Aimson-a'n hnehna chang turin harsatna a nei bik lo. Chak zawk tur zawnnaah India ram number 3 Pratul Joshi chu Chanmari player Ismael Azyu lakah a talbuai a, amaherawhchu Ismael hian first set la tura a inngaih hnuah 14-15 a hloh leh si avangin ngai a awh tawh lo a, Joshi-a'n set hnihna 15-7 in a la zui bawk.