FIFA World Cup 2018 Denmark fapa rangkachak Eriksen

FIFA World Cup hnuhnung pali a inlan phak lo Denmark chuan an khel phak ve leh dawn ta. Denmark-in Russia panna ticket an neih theih chhan chu Christian Eriksen an neih vang a ni. Thawhlehni zan playoff inkhelah Eriksen-a'n hattrick siamin Republic of Ireland chu 5-1 in an luhchhuah, a vawi nga nan ram leh ram football hmanga inelna ngaihhlut ber World Cup an khel dawn.

Ram pahnihte Denmark-a an inkhelh ṭumin goal a lut lo a, Martin O'Neill-a naute tan kawng a awlsam dawn niin a lang. Republic of Ireland hian tun hnaiah an mikhual team 11 zinga team pakhat chiah hneh loh an neih a vangin kum 2002 hnua a hmasa ber ni turin World Cup khelh beiseina an nei sang hle.

Mi bik Eriksen

Aviva Stadium-a inkhelah Ireland defender Shane Duffy chuan minute rukna lekah goal khungin an ke lehlamin Russia an rap hman. Striker Daryl Mur­phy leh winger James McClean ten goal ban hrulah an hun ṭha neih an khawhral a, minute 29-naah defender Cyrus Christie chuan anmahni lamah ti lutin mikhual siphurh a sut sak.

Denmark-in an siphurh an sut aṭanga minute thum hnu lekah ven loha awm Tottenham midfielder Eriksen chuan box chhung chiah aṭangin an hma­hruaina goal a hlap lut a, second half-ah box pawn aṭangin an goal thumna mawi taka a pet luh bakah defender ball pet chhuah fuh lo nang chingin a hlap lut zui bawk - mikhual goal hnuhnung ber hi Arsenal striker hlui Nicklas Bendtner-a'n penalty aṭanga a khung a ni thung.

Kum 25 mi Eriksen chuan, "World Cup khelh ngei tum hian hun rei tak chhung chu thi leh thau pawlhin kan bei tawh a, a nihna takah chuan tun ṭuma kan inkhelh chhung zawng khan ka hlauthawng tluan chhuak zak. Goal thum khung hi a ropui a, ka lawmna ber chu kan ramin World Cup kan khel tur hi a ni," tiin a sawi.

Eriksen hian ram tan match 75 a khelh aṭangin goal 21 a khung tawh, a goal khung zinga 11 chu tun qualifier chhunga a khung niin European 2018 World Cup qualifiers khel midfielder zingah ani aia goal khung hnem an awm lo, assists vawi thum a nei bawk; Denmark tan chuan fapa hrin man awm leh hlu bik a ni chiang.

Hneh loh nei lo Danes

Manager Morten Olsen-a'n Euro 2016 a khelhpui phak loh hnuah Norwegian veteran manager Age Hareide-a'n Denmark team a enkawl. Kum 64 mi Hareide kaihhruaina hnuaiah match nga hnehna changin vawi li dang chu an khingpuite nen an inhnehtawk - kum 2017 chhungin hneh loh an tawng lo.

Denmark manager Age Hareide chuan,"Inkhelh harsat­na hmuna hnehna kan chan avangin ka lawm, Republic of Ireland hian an khelmualah goal nga an chhuah zen zen lo a ni," a ti. Republic of Ireland hian kum 2012 October khan Germany chu 6-1 in an ngam lo a, hemi hnua an chak loh chian ber ṭum a ni.

Hattrick siamtu fak zuiin Hareide chuan, "Eriksen hi world class player a ni a, pla­yer thiam chungchuang a nih bakah a khelhpuite fuihtu leh an entawn a ni. Player zawng zawngin an khel ṭha a, thawhhona ṭha vangin kan tum ram kan thleng a ni," tiin a sawi.