Belgium tana goal khung hnem ber Romelu Lukaku

Romelu Lukaku chu Bel­gim tana goal khung hnem ber a ni ta. Manchester Uni­ted striker Lukaku hian Thawh­lehni zana Japan nen friendly match an khelh ṭumin goal awmchhun a khung a, Bernard Voorhoof leh Paul van Himst te nen a record inṭawm an neih (30 goals) khumin ram tan goal 31 a khung tling.

Kum 24 mi Lukaku hian record thar siam tur hian minute 72-naah West Brom winger Nacer Chadli-a cross chu a tauh lut a ni. Lukaku hian Belgium tana goal khung hnem ber dinhmun luah tur hian match 65 bak a mamawh lo.

World Cup hnuhnung bera quarterfinalist Belgium hian hneh loh nei loin match 15 an kaltluang ta a, an chak loh hnuhnun ber chu kum 2016 September kha niin friendly match-ah Spain an hneh lo.

Tun season kal laia Premier League goal sarih khung tawhtu Lukaku chuan, "Kum hnih liam ta khan Everton-a ka awm laiin Roberto Martinez hian box chhunga striker chet dan ṭha video min entir a, Hugo Sanchez, Edinson Cavani leh Javier Hernandez te chevel kha ka en a ni, an chet dan aṭang khan goal hmaa chet dan tam tak ka zir chhuak," goal khung kawnga hma a sawn theih nan player dangte chetdan a en ngun thu a sawi.