Sergio Aguero dinhmun a ṭha
Argentina leh Nigeria ten friendly match an khelh ṭumin Sergio Aguero chu half time laiin dressing room-ah luhaiin a tlu a, Manchester City striker hi damdawi inah hruai niin a dinhmun a ṭha leh tawh.
Thawhlehni zan inkhelah world champion vawi hnih ni tawh Argentina tan Lionel Messi a inlan lo a, Barcelona thiampuipa a inlan loh chhan hi club leh Argentina FA lamin inremna an neih vang a ni.
Argentina hian Ever Banega leh Aguero te hmangin si hnih faiin hma hruai mah se Nigeria lam tan Arsenal forward Alex Iwobi chuan goal hnih khungin Kelechi Iheanacho leh Brian Idowu ten goal khungin 4-2 in an lehthal.
Argentina manager Jorge Sampaoli chuan, "Aguero kha a lu a hai a, endik tura lak sawn kha a ngai a ni," tiin dressing room aṭanga damdawi in lam an pan pui chhan a sawi a; Argentina team lam chuan an striker hi a dinhmun a ṭhat thu leh player dang bulah a awm zui theih thu an sawi zui bawk.
Kum 29 mi Aguero hi September thla khan Amsterdam-ah a car chuanna chesualin a nakah hliam a tuar tawh a, tun hnaiah rawn kir lehin Nigeria nen an inkhelh ṭum hian chawlhlawk an neih hma pawhin a awm a nuam lo tawh; damawi inah Aquero hruai a nih hnuah a ṭhian ten an dinhmun hre chiang lo chungin khelmual an lut zui a, an inkhel result-in a tuar phah zui ta niin a lang.
Manchester City chuan an club tana goal khung hnem ber Aguero chungchang sawiin, "Nikhaw hre loin a awm lo, a hriselna dinhmun endik a ngaih avangin damdawi inah khan hruai a ni. Kartawpa Leicester City nen Premier League kan khelh hmain a dinhmun endik leh a ni ang," tiin an sawi.
Premier League hmahruaitu City hian tun season Premier League match 11 an khelh tawhah hneh loh an la tawng lo a, Inrinni zan dar 8:30 hian Leicester City an lenchilh ang.