T20 World Cup champion England

Cricket khawvela roreltu ni turin England chuan nimin khan Pakistan chu T20 Cricket World Cup-ah wicket 5-in an hneh. Three Lions hian kum 2009 khan ODI World Cup-ah New Zealand hnehin nomawi an chawi tawh bawk a, tunah chuan T20 leh ODI World Cup nomawi kawltu an ni ta.

Melbourne Cricket Ground-ah England an vannei a, ṭhumvawrah an chak. Jos Buttler-a'n inngaihtuah buai loin vawm hmasak a thlang a, English bowler-te an che ṭha.

Pakistan chhuanvawr Mohammed Rizwan (15) leh Babar Azam (32) ten 29 runs an siam hman a, che chhe hran lo mah se chakpui tham runs an vaw chhuak lo. Shan Masood (38) leh Shadab Khan (20) te zarah Pakistan-in 137/8 runs chauh an siam thei a, an dinhmun a ṭha lo.

England bowler Sam Curran (12/3) a che ṭha fal a; Adil Rashid (22/2), Chris Jordan (27/2) leh Ben Stokes (32/1) ten an thlawp ṭha bawk.

Target a sang lo, England tan awlsam taka chak theihin lang mah se Pakistan-in bowler an nei ṭha ve tlat. Opener Alex Hales chu run khat chauh siamin a thi a, Jos Buttler (26), Phil Salt (10) leh Harry Brook (20) te pawhin run tam an siam thei lo.

Three Lions chu chak chiang sa aṭangin chak lo thei dinhmunah an ding a, Ben Stokes meuh pawhin vuak fuh a harsat. Ball 30-ah 41 runs siam a la ngai a, Shaheen Afridi-a'n run vawmin 'dot ball' a nei nghal mah se Paksitan chhuanvawr hi a inhliam.

Inkhel boruak a dang ta daih. Afridi aiawhtu Iftikhar Ahmed chu Stokes-a'n four leh six a vuaksak a, Moheen Ali pawhin a zawnin four a vua. Over thum a la awm chuan 12 runs chauh siam a ngaih tawh.

Moeen Ali-a'n ball 13-ah 19 runs a siam a, a tawp thleng lo mah se a hnathawh pawimawh. Hun pawimawha che ṭha tura duan tih mai tura player danglam bik Stokes-a'n a theihna sang tak a pholang a, ball 49-ah 52 runs a siam bakah champion-na run a vaw chhuak bawk.

Egnland-in over khat dah bangin 138/5 runs an siam. Player of the match leh player of the tournament-ah England bowler ṭha Sam Curran chu thlan a ni a, kum 25 mi Curran hi Super 12, semifinal leh final-ah akhel ṭha vek. Three Lions hian kum 2010 hnuah T20 World Cup-ah an champion a, West Indies nen vawi hnih champion thei an ni.