Taekwondo-ah Mizo tan medal a sur

Mizoram taekwondo team-ten Shillong khawpuiah Mizo hming an timawi a, he thu buatsaih a nih laia Mizo player-ten taekwondo bik ringawta medal an hlawhchhuah zat hi 18 a tling tawh - heng zinga pathum chu gold niin, silver medal pali leh bronze medal 11 an hlawh chhuak tawh bawk.

Zirtawpni zan khan Daniel Lalhumthanga chuan Senior Men Poomsae individual-ah gold medal a hlawh chhuak a, Pansy Rampanzeli (Junior Girls Poomsae individual) leh Pansy & Lalrinchhana (Taekwondo Poomsae Junior pair) ten silver medal an hlawh chhuak thung.

Joseph Vanlalpekhlua (Junior Boys Poomsae individual), Vanlalhmangaihzuali (Senior Women Poomsae individual), Vanlalmuanpuii Ralte & H. Vanlalfela (Taekwondo Poomsae Senior pair) ten bronze medal-ah lungawi an zir bawk.

Inrinni khan taekwondo inelna hi neih chhunzawm niin, Mizo taekwondo-te hian gold pakhat, silver pahnih leh bronze pathum an la lak belh a, Mizoram tan overall-a dinhmun sang taka ding turin beiseina an siamsak zel.

Junior Under 59 kg inelnaah Lalremmuana chuan gold medal hlawh chhuakin a hming a chher a, Malsawmtluangi (Junior Under 55 kg) leh Lalrinngheti Sailo (Junior Under 52 kg) ten final-ah an khingpui ve ve hneh zo loin silver-a lungawi an zir a ṭul thung.

Junior Under 46kg-ah Vanbiakpari chuan bronze medal a hlawh chhuak hram a, Robert Muanthansanga (Junior Under 48 kg) leh H. Lalremruata (Junior Under 63 kg) ten Mizoram tan bronze medal an hawn thei bawk.