Mizoramin final an lut

2nd NorthEast Olympic 2022 football-ah Mizoram chuan nimin khan final-ah Nagaland 3-1 in an hneh a, final an lut. Gold medal inchuhna November 16, Nilaini chawhnu dar 1:00-ah neih a ni dawn a, inelna thlengtu Meghalaya leh Manipur chak zawk an hmachhawn ang.

MFA Ground, Shillong-a inkhelah Mizoramin bul ṭan ṭha mah se Nagaland-in goal an khung hmasa. Minute 11-na lekah Nagaland winger Pursun chuan vei lam aṭanga chak taka la lutin goal hmahruai a khung a, a goal khung lawm nan vawi thum lai a invawrh.

Lunglei Bazar Veng tlangval Joseph Lalvenhima'n penalty a hlawh chhuak a, Assam laka goal li khungtu forward hian penalty hi minute 22-naah goal-ah a chantir. Mizoram an khel ṭha chhunzawm a, Augustine Lalrochana ball pek chu Cherhlun rawlthar Aron Vanlalrinchhana'n ṭha zetin minute 39-naah a khung.

Mizoramin inkhel an thunun chhunzawm a, minute 51-naah Hnahthial rawlthar Rohlupuia'n (Mapuia) keeper dinglam hrulah a pet goal a, 3-1 a ni. Mapuia hian Mizoram tan goal a la khung vek a, mak ang reng tak erawh minute 50-na bawrah vek a khung. Coach HC Zarzoliana hote hian goal khung belh theihna dang pawh an la nei a, amaherawhchu Augustine, Joseph leh K. Lalrosanga te an hun ṭha neih an hmang ṭangkai lo.

Group Stage
November 9, Nilaini
Mizoram 6 - 0 Assam
MIZ : Joseph Lalvenhima 18', 25', 37', 62'; K. Lalrosanga 47'; Rohlupuia 51'
November 11, Zirtawpni
Mizoram 1 - 0 Manipur
MIZ : Rohlupuia 50'

Semifinal
Mizoram 3 - 1 Nagaland
MIZ : Joseph Lalvenhima 22'; Aron Vanlalrinchhana 39'; Rohlupuia 51'
NAG : Pursun 11'